ഹൈദരാബാദ് : തെലങ്കാനയില് കുടിയേറ്റ തൊഴിലാളി കുടുംബങ്ങളിലെ 9 പേരെ കിണറ്റില് മരിച്ച നിലയില് കണ്ടെത്തി. തെലങ്കാനയിലെ വാറങ്കലിലെ ചണച്ചാക്ക് നിര്മ്മാണ കമ്പിനിയിലെ തെഴിലാളിയായ മുഹമ്മദ് മക്ദ്സൂദ് അലാം, ഭാര്യ നിഷ, മക്കള്, മറ്റൊരു തൊഴിലാളിയായ ശ്രീറാം ഇയാളുടെ ഭാര്യ, മക്കള് എന്നിവരടക്കം ഒമ്പത് പേരെയാണ് മരിച്ച നിലയില് കണ്ടെത്തിയത്.
ഇവര് പശ്ചിമ ബംഗാള് സ്വദേശികളാണ്. ലോക്ക് ഡൗണിനെത്തുടര്ന്ന് കഴിഞ്ഞ രണ്ട് മാസമായി ഇവര്ക്ക് തൊഴിലുണ്ടായിരുന്നില്ല. ഇതെത്തുടര്ന്നുണ്ടായ സാമ്പത്തിക പ്രതിസന്ധി കാരണമാണ് കുടുംബം ആത്മഹത്യ ചെയ്തതെന്ന നിഗമനത്തിലാണ് പോലീസ്. ജോലിയില്ലെങ്കിലും ഇവര്ക്ക് ഭക്ഷണമടക്കമെത്തിച്ചിരുന്നുവെന്നും താന് നേരിട്ടാണ് ഭക്ഷമെത്തിച്ചതെന്നുമാണ് കമ്പിനിയുടമ നല്കുന്ന വിവരം. അതേസമയം ഇവരുടെ കുടുംബത്തില് ഒരാള്ക്ക് കൊവിഡുണ്ടായിരുന്നതായും അത് മൂലമുണ്ടായ ഭയമാണ് മരണത്തിന് കാരണമെന്നുമുള്ള അഭ്യൂഹങ്ങളുമുയരുന്നുണ്ട്. എന്നാല് ഇക്കാര്യം പോലീസ് സ്ഥിരീകരിച്ചിട്ടില്ല.
തൊഴിലാളികളെയും കുടുംബത്തെയും കാണാതായതിനെത്തുടര്ന്ന് കമ്പിനിയുടമയടക്കം തിരച്ചില് നടത്തിയിരുന്നു. പിന്നീടാണ് സമീപത്തെ കിണറ്റില് നാല് പേരെ മരിച്ച നിലയില് കണ്ടെത്തിയത്. പിന്നാലെ കിണറ്റില് നടത്തിയ തിരച്ചിലിലാണ് ബാക്കി അഞ്ച് പേരുടേയും മൃതദേഹം കണ്ടെത്തിയത്.
