ഡൽഹി : ഡൽഹി ചാന്ദ്നി ചൗക്കിലെ വോട്ടർപട്ടികയിൽ നിന്ന് പുറത്തായവർക്ക് ഫോം സിക്സ് ഇന്ന് വിതരണം ചെയ്യും. പുതുതായി വോട്ടർപട്ടികയിൽ ഉൾപ്പെടുത്തുന്നതിനായുള്ള ഫോമാണ് കമ്മീഷൻ വിതരണം ചെയ്യുന്നത്. ബെല്ലാ എസ്റ്റേറ്റിലെ ബൂത്തിൽ നിന്ന് വോട്ടുകൾ കൂട്ടത്തോടെ വെട്ടിയത് വിവാദമായതിന് പിന്നാലെയാണ് കമ്മീഷന്റെ നടപടി. വോട്ടർ പട്ടികയിൽ നിന്ന് പുറത്തായ 632 പേർക്കുള്ള പുതിയ ഫോമാണ് തെരഞ്ഞെടുപ്പ് കമ്മീഷൻ വിതരണം ചെയ്യുന്നത്. പട്ടികയിൽ നിന്ന് പുറത്തായ വരെ ഫോം സിക്സ് വഴി ഉൾപ്പെടുത്താനാണ് തെരഞ്ഞെടുപ്പ് കമ്മീഷന്റെ തീരുമാനം. ഫോമിലെ രേഖകൾ പരിശോധിച്ച ശേഷം ആയിരിക്കും പട്ടികയിൽ ഉൾപ്പെടുത്തുന്നതിൽ കമ്മീഷൻ അന്തിമ തീരുമാനമെടുക്കുക.
ചാന്ദ്നി ചൗക് മണ്ഡലത്തിലെ 38 ബൂത്ത് നമ്പർ ആയ ബെല്ലാ എസ്റ്റേറ്റിലാണ് ഒരാളെ മാത്രം നിലനിർത്തി കൂട്ടത്തോടെ വോട്ടർമാരെ നീക്കം ചെയ്തത്. എന്യുമറേഷൻ ഫോമുകൾ വിതരണം ചെയ്യുന്നതിലും കൈപ്പറ്റുന്നതിലും ബൂത്ത് ലെവൽ ഓഫീസർക്ക് ഗുരുതര പിഴവുകൾ സംഭവിച്ചതായി വോട്ടർമാർ പരാതിപ്പെട്ടിരുന്നു. സംഭവം വിവാദമായതോടെ പ്രദേശത്തെ വോട്ടർമാർക്ക് ആയി നാളെ പ്രത്യേക ക്യാമ്പ് സംഘടിപ്പിക്കും എന്നും തെരഞ്ഞെടുപ്പ് ഓഫീസർ അറിയിച്ചു. കഴിഞ്ഞ നിയമസഭാ തെരഞ്ഞെടുപ്പിൽ വോട്ട് ചെയ്തവരെയാണ് താമസം മാറി എന്ന പേരിൽ കമ്മീഷൻ കരട് വോട്ടർ പട്ടികയിൽ നിന്ന് പുറത്താക്കിയത്.
