കോട്ടക്കല്‍: കണ്ടെയ്ന്‍മെന്‍റ് സോണായി തുടരുന്ന കോട്ടക്കലില്‍ ഭരണ-പ്രതിപക്ഷ കൈയാങ്കളി. വോട്ടര്‍ പട്ടിക അട്ടിമറിച്ചെന്ന സി.പി.എം ആരോപണത്തിന് പിന്നാലെയാണ് സംഭവം. പരാതി നല്‍കാന്‍ തെരഞ്ഞെടുപ്പ് വരണാധികാരികൂടിയായ സെക്രട്ടറിക്ക് പരാതി നല്‍കാന്‍ എത്തിയതാണ് ഇടതുപക്ഷ കൗണ്‍സിലര്‍മാര്‍.
തൊട്ടുപിന്നാലെ ഭരണ സമിതിയംഗങ്ങളും ലീഗ് നേതാക്കളുമെത്തി. ഇതോടെ വാക്കുതര്‍ക്കമായി. വിഷയത്തില്‍ ഇടപ്പെട്ട് സി.പി.എം നേതാക്കളും എത്തിയതോടെ നഗരസഭ കാര്യാലയം സംഘര്‍ഷഭരിതമായി. പിന്നാലെ, വിവരമറിഞ്ഞെത്തിയ പോലീസ് ഇടപെട്ടാണ് പ്രശ്നത്തിന് താല്‍ക്കാലിക പരിഹാരമായത്. പ്രോട്ടോക്കോള്‍ ലംഘിച്ച്‌ അമ്പതോളം പേരാണ് ഇവിടെ തടിച്ചുകൂടിയത്.
നൂറ്റിയമ്പതോളം രോഗികള്‍ ഉള്ള ഇവിടെ എട്ടുവാര്‍ഡുകളില്‍ നിയന്ത്രണം ഏര്‍പ്പെടുത്തിയിട്ടുണ്ടെങ്കിലും ഇതെല്ലാം തകിടം മറിഞ്ഞ നിലയിലാണ്. നാനൂറോളം പേരാണ് വോട്ടര്‍ പട്ടികയില്‍ നിന്നും പുറത്തായതെന്നാണ് സി.പി.എം പറയുന്നത്. ഇതിന് പരിഹാരം കാണണമെന്നാണ് ആവശ്യം. പരാതിക്കാര്‍ നേരിട്ട് ഹാജരാകണമെന്ന സെക്രട്ടറിയുടെ നിലപാടാണ് തര്‍ക്കത്തിന് വഴിവെച്ചതെന്ന് സി.പി.എം ആരോപിക്കുന്നു. പ്രോട്ടോക്കോള്‍ അനുസരിച്ചാണ് നടപടിയെന്നാണ് സെക്രട്ടറിയുടെ വിശദീകരണം.
