ന്യുഡല്ഹി : പോപ്പുലര് ഫൈനാന്സ് നിക്ഷേപ തട്ടിപ്പില് ഓരോ പരാതിക്കും പ്രത്യേകം എഫ്.ഐ.ആര് ഇടണമെന്ന കേരള ഹൈക്കോടതി വിധിക്കെതിരെ കേരള സര്ക്കാര് സുപ്രീം കോടതിയിലേക്കെന്നു സൂചന. ഇതിനെതിരെ നിക്ഷേപകരുടെ സംഘടനയായ പോപ്പുലര് ഗ്രൂപ്പ് ഇന്വെസ്റ്റേഴ്സ് അസോസിയേഷന് സുപ്രീം കോടതിയില് തടസ്സ ഹര്ജി ഫയല് ചെയ്തു. പി.ജി.ഐ.എക്ക് വേണ്ടി ഡല്ഹി ആസ്ഥാനമായ ന്യുട്ടന്സ് ലോ അഭിഭാഷക ഗ്രൂപ്പാണ് ഹര്ജി ഫയല് ചെയ്തത്. അഡ്വ. മനോജ് വി. ജോര്ജ്ജ്, അഡ്വ.രാജേഷ് കുമാര് റ്റി.കെ എന്നിവര് ഹാജരായി.
സര്ക്കാരിന്റെയും പോലീസിന്റെയും നീക്കം തട്ടിപ്പിനിരയായ നിക്ഷേപകരെ ആശ്ചര്യപ്പെടുത്തിയിരിക്കുകയാണ്. പ്രതികളുടെ താല്പ്പര്യങ്ങള് സംരക്ഷിക്കുവാനാണ് ഈ നീക്കമെന്ന് കരുതുന്നതായി പി.ജി.ഐ.എ സെക്രട്ടറി അഡ്വ. ബിന്ദു പറഞ്ഞു. നിക്ഷേപകരുടെ താല്പ്പര്യങ്ങള് സംരക്ഷിക്കുവാന് ഏതറ്റംവരെയും പോകുമെന്നും പോലീസ് നടപടികള് മനപൂര്വം വൈകിപ്പിക്കുകയാണെന്നും അവര് പറഞ്ഞു. ഹൈക്കോടതി പറഞ്ഞിട്ടും പ്രത്യേകം എഫ്.ഐ.ആര് രജിസ്റ്റര് ചെയ്യുവാന് പോലീസിന് മടിയാണ്. തട്ടിപ്പിനിരയായ നിക്ഷേപകര് പോലീസ് സ്റ്റേഷന് കയറിയിറങ്ങുവാന് തുടങ്ങിയിട്ട് നാളുകളായി. നടപടികള് മനപൂര്വം വൈകിപ്പിക്കുന്നത് പ്രതികള്ക്ക് രക്ഷപെടുവാന് അവസരമൊരുക്കുമെന്നും നിക്ഷേപകര് പറയുന്നു.