സീതത്തോട് : സീതത്തോട്ടിൽ അക്വാട്ടിക്ക് സെൻ്റർ സ്ഥാപിക്കുമെന്നും, ഇവിടെ അക്വാ സ്പോട്സിൽ പരിശീലന കേന്ദ്രം ആരംഭിക്കുമെന്നും അഡ്വ.കെ.യു.ജനീഷ് കുമാർ എം.എൽ.എ പറഞ്ഞു. ടൂറിസവുമായി ബന്ധപ്പെട്ട് യുവാക്കൾക്ക് തൊഴിലും, വരുവാനവും ലഭ്യമാകുന്നതിനൊപ്പം രാജ്യത്തിന് മികച്ച കായിക താരങ്ങളേയും സൃഷ്ടിക്കുന്ന നിലയിലേക്ക് അക്വാട്ടിക്ക് സെൻ്ററിനെ മാറ്റി തീർക്കാൻ കഴിയും. സായിയുടെ അംഗീകാരത്തോടെയുള്ള അന്താരാഷ്ട്ര നിലവാരത്തിലുള്ള പരിശീലനമാണ് ഇവിടെ ഉദ്ദേശിക്കുന്നത്.
കോന്നിയ്ക്കും, സീതത്തോടിനും അനന്തമായ ടൂറിസം സാധ്യതകൾക്ക് ഈ പദ്ധതി സഹായകമാകും. കയാക്കിങിലും, റാഫ്റ്റിംഗിലും പ്രാദേശികമായി യുവാക്കൾക്ക് പരിശീലനം നല്കും. ഇത്തരത്തിൽ പരിശീലനം നേടുന്ന പ്രതിഭകളെ അന്താരാഷ്ട്ര നിലവാരത്തിലുള്ള മത്സരങ്ങളിൽ പങ്കെടുക്കാൻ കഴിയുന്ന നിലയിൽ പ്രാപ്തരാക്കും. കോന്നി ടൂറിസം ഗ്രാമത്തിൻ്റെ ഭാഗമായി എല്ലാ പഞ്ചായത്തിലും തദ്ദേശീയമായ ടൂറിസം സാധ്യതകൾ കണ്ടെത്തി വളർത്തിയെടുക്കുക എന്നതാണ് ഉദ്ദേശിക്കുന്നത്.
ഇതിനായി വിശദമായ മാസ്റ്റർ പ്ലാൻ തയ്യാറാക്കി വരികയാണ്. സർക്കാരിൻ്റെയും, തദ്ദേശ സ്വയംഭരണ സ്ഥാപനങ്ങളുടെയും സഹായത്തോടെ സഹകരണ മേഖലയിലാണ് കോന്നി ടൂറിസം ഗ്രാമം യാഥാർഥ്യമാക്കുന്നത്.
കോന്നിയുടെ വികസനം ടൂറിസത്തിലൂടെ എന്ന ലക്ഷ്യം മുൻനിർത്തി നടത്തുന്ന ടൂറിസം ഗ്രാമം പദ്ധതി സംസ്ഥാനത്തിനു തന്നെ മാതൃകയാകുമെന്നും എം.എൽ.എ പറഞ്ഞു. ഇതിനായി എല്ലാ ഡിപ്പാർട്ടുമെൻ്റുകളേയും, ജില്ലാ ഭരണകൂടത്തെയും, സ്വകാര്യ മേഖലയെയുമെല്ലാം ഏകോപിപ്പിക്കുമെന്നും എം.എൽ.എ പറഞ്ഞു.