പാലക്കാട് : കായികമേഖലയില്‍ കൃത്യമായ ഇടപെടല്‍ ഉണ്ടായാല്‍ സംസ്ഥാനത്തിന് ശക്തമായ തിരിച്ചു വരവ് നടത്താനാകും. മുന്‍ സര്‍ക്കാരിന്റെ കാലത്ത് ആയിരം കോടിയിലധികം തുക കായിക അടിസ്ഥാന സൗകര്യങ്ങള്‍ക്ക് വേണ്ടി മാറ്റി വച്ചിട്ടുണ്ട്. ഇതില്‍ പല പ്രവര്‍ത്തികളും പൂര്‍ത്തിയായിക്കൊണ്ടിരിക്കുകയാണ്. സംസ്ഥാനത്ത് 58 ഓളം സ്റ്റേഡിയങ്ങള്‍ പുതുതായി പണി പൂര്‍ത്തിയാക്കുകയാണ്. കളക്ടറേറ്റ് കോണ്‍ഫറന്‍സ് ഹാളില്‍ നടത്തിയ പത്രസമ്മേളനത്തിലാണ് മന്ത്രി ഇക്കാര്യം പറഞ്ഞത്.
ജില്ലാ ആസ്ഥാനങ്ങളില്‍ അന്താരാഷ്ട്ര നിലവാരത്തിലുള്ള പുതിയ ഗ്രൗണ്ടുകള്‍ തയ്യാറാക്കും. പാലക്കാട്, കോഴിക്കോട് ഒഴികെയുള്ള ജില്ലകളില്‍ നിലവില്‍ ഇത്തരം ഗ്രൗണ്ടുകളുടെ പണി നടന്നുകൊണ്ടിരിക്കുകയാണ്. പാലക്കാട് ജില്ലയില്‍ ഇത്തരത്തില്‍ ഗ്രൗണ്ടിനായി സ്ഥലം കണ്ടെത്തിയാല്‍ ഉടന്‍ പണി ആരംഭിക്കും. ഇതിനായി 40 കോടി രൂപ മാറ്റിവെച്ചുട്ടുള്ളതായി മന്ത്രി പറഞ്ഞു.
കായിക നയത്തിന്റെ കരട് രേഖ അടുത്തമാസം അവസാനത്തോടെ ജില്ലകളിലെ സ്പോര്‍ട്സ് കൗണ്‍സിലുകളില്‍ എത്തിക്കും. അതാത് ജില്ലകളിലെ കായികതാരങ്ങള്‍, വിദഗ്ധര്‍, മാധ്യമങ്ങള്‍, കായിക അധ്യാപകര്‍ എന്നിവരുമായി ചര്‍ച്ച നടത്തി കായിക നയത്തില്‍ മാറ്റങ്ങള്‍ നിര്‍ദ്ദേശിച്ചാല്‍ അവ ഉള്‍പ്പെടുത്തുമെന്നും അദ്ദേഹം പറഞ്ഞു.
