കോഴിക്കോട്‌ : ഡീസൽ വില അനിയന്ത്രിതമായി വർധിക്കുന്ന സാഹചര്യത്തിൽ നവംബർ ഒമ്പത്‌ മുതൽ സ്വകാര്യ ബസ്‌ സർവീസ്‌ നിർത്തിവയ്ക്കുകയാണെന്ന് ജില്ലാ ബസ്‌ ഓപ്പറേറ്റേഴ്‌സ്‌ അസോസിയേഷൻ ജില്ലാ കമ്മിറ്റി. നഷ്ടം സഹിച്ച്‌ പിടിച്ചുനിൽക്കാൻ കഴിയാത്ത സാഹചര്യത്തിലാണ്‌ സമരം.
നികുതി ഒഴിവാക്കുക, ബസ്‌ ചാർജ്‌ വർധിപ്പിക്കുക, വിദ്യാർഥികളുടെ കൺസഷൻ 50 ശതമാനമാക്കുക, റോഡ്‌ നികുതി ഒഴിവാക്കുക തുടങ്ങിയ ആവശ്യങ്ങളുന്നയിച്ചാണ്‌ ബസ്‌ ഓട്ടം നിർത്തുന്നത്‌. യോഗത്തിൽ ജില്ലാ പ്രസിഡന്റ്‌ കെ.ടി വാസുദേവൻ അധ്യക്ഷനായി. ജനറൽ സെക്രട്ടറി എം.തുളസീദാസ്‌, ട്രഷറർ എം.എസ്‌ സാജു, ഇ.റനീഷ്‌, അബ്ദുൾ സത്താർ, കെ.ടി ബീരാൻ കോയ, മനോജ്‌ കുമാർ, പി.ആലി എന്നിവർ സംസാരിച്ചു.
