തിരുവനന്തപുരം : തിരുവനന്തപുരം മെഡിക്കല് കോളേജ് ആശുപത്രിലെ മൈക്രോബയോളജി ലാബില് ആള്ക്ഷാമം നേരിടുന്നു അതിനാല് ലാബ് 24 മണിക്കൂറും പ്രവര്ത്തിക്കില്ലെന്ന് ജീവനക്കാര്. പരിശോധന മുടക്കിയാല് നടപടി എടുക്കുമെന്ന് മെഡിക്കല് കോളേജ് സൂപ്രണ്ട്. കൊവിഡ് ബ്രിഗേഡിലുള്ളവരെ പിരിച്ചുവിട്ടതോടെ ആള്ക്ഷാമം ഉണ്ടെന്നും അതിനാല് വൈകീട്ട് നാല് മണിക്ക് ശേഷം കൊവിഡ് ടെസ്റ്റ് ചെയ്യില്ലെന്നുമാണ് മൈക്രോബയോളജി ലാബ് ജീവനക്കാര് അറിയിച്ചിരുന്നത്.
മതിയായ ജീവനക്കാരില്ലാത്തതിനാല് രാവിലെ 8:30 മുതല് വൈകീട്ട് 4 വരെ മാത്രമേ പ്രവര്ത്തിക്കൂ എന്നും 3.30 വരെ മാത്രമേ സാമ്പിളുകള് സ്വീകരിക്കുകയുള്ളൂ എന്നുമായിരുന്നു മൈക്രോബയോളജി ലാബ് അറിയിച്ചിരുന്നത്. ഇത് മെഡിക്കല് കോളേജിലെ അടിയന്തര ശസ്ത്രക്രിയയെയും മൃതദേഹ കൊവിഡ് പരിശോധനയെയും ബാധിക്കുമോ എന്ന ആശങ്കയ്ക്ക് ഇടയാക്കിയിരുന്നു. എന്നാല്, വിഷയം ശ്രദ്ധയില്പ്പെട്ടെന്നും മൈക്രോബയോളജി ലാബ് ജീവനക്കാരോട് പരിശോധന തുടരണമെന്ന് അറിയിച്ചിട്ടുണ്ടെന്നും പരിശോധന മുടങ്ങിയാല് നടപടി ഉണ്ടാകുമെന്നും സൂപ്രണ്ട് അറിയിച്ചു.