തേഞ്ഞിപ്പലം : പശ്ചിമഘട്ടത്തിൽനിന്നും വടക്കുകിഴക്കൻ ഹിമാലയനിരകളിൽ നിന്നുമായി ആറു പുതിയ സസ്യങ്ങളെ തിരിച്ചറിഞ്ഞ് കാലിക്കറ്റ് സർവകലാശാലയിലെ ഗവേഷകസംഘം. സസ്യശാസ്ത്രവിഭാഗം പ്രൊഫസർ ഡോ.സന്തോഷ് നമ്പിയുടെ നേതൃത്വത്തിലാണ് കണ്ടെത്തൽ. ജസ്നേറിയെസിയെ കുടുംബത്തിൽപ്പെട്ട സസ്യങ്ങളെക്കുറിച്ചുള്ള പഠനത്തിന്റെ ഭാഗമായി ചേമഞ്ചേരി സ്വദേശി എം.കെ അഖിൽ, ഒല്ലൂർ സ്വദേശി വിഷ്ണുമോഹൻ എന്നിവർ ഹെൻകെലിയ ജനുസ്സിൽപ്പെട്ട സസ്യത്തെ മേഘാലയയിലെ ഈസ്റ്റ് ഖാസി ജില്ലയിൽനിന്നു കണ്ടെത്തി. ഇതിന് ഹെൻകെലിയ ഖാസിയാന എന്ന് പേരുനൽകി.
മെലാസ്റ്റോമെറ്റേസിയ സസ്യ കുടുംബത്തിലെ സുന്ദരിയില എന്നറിയപ്പെടുന്ന സോണറില ജനുസ്സിലുള്ളതാണ് മറ്റൊരു സസ്യം. സൗത്ത് ഗോവ സാൽസെറ്റ് താലൂക്കിലെ ചന്ദ്രേശ്വർ മലയിൽനിന്നു കണ്ടെത്തിയ ചെറിയ കിഴങ്ങുകളോടുകൂടിയ സസ്യത്തിന് സോണറില കൊങ്കനെൻസിസ് എന്നാണ് പേരിട്ടിരിക്കുന്നത്. പ്രൊഫ.സന്തോഷ് നമ്പി, ഗവേഷക തൃശ്ശൂർ ചേലക്കര സ്വദേശിനി എസ്. രശ്മി, ഗോവ യൂണിവേഴ്സിറ്റി ബോട്ടണി ഗവേഷക പി.എഫ്. അക്ഷത്ര എന്നിവരാണ് തിരിച്ചറിഞ്ഞത്.