കോട്ടക്കല്‍ : ബ്യൂട്ടീഷന്‍ കേന്ദ്രത്തില്‍ ജോലി ആവശ്യത്തിനായി എത്തിയ ബംഗളൂരു സ്വദേശിയായ യുവതിയെ തമസസ്ഥലത്ത് കയറി അക്രമിച്ചതായി പരാതി. എടരിക്കോട്ട് സ്വകാര്യ ആശുപത്രിയില്‍ ചികിത്സ തേടിയ യുവതിയും ബന്ധുക്കളും ജില്ല പോലീസ് മേധാവിക്ക് പരാതി നല്‍കി. ചങ്കുവെട്ടി ജങ്ഷനില്‍ ട്രാവല്‍സ് നടത്തുന്ന ജാബിറിനെതിരെയാണ് പരാതി. രണ്ട് ദിവസം മുമ്പാണ് അഭിമുഖത്തിനായി 25കാരി കോട്ടക്കലില്‍ എത്തുന്നത്. തിരിച്ച്‌ തിരുവനന്തപുരത്തേക്ക് പോകുന്നതിനായുള്ള ടിക്കറ്റിനായി ട്രാവല്‍സ് ഉടമയായ ജാബിറിനെ സമീപിച്ചു. ഇതിനിടയില്‍ അപമര്യാദയായി പെരുമാറിയെന്നാണ് യുവതിയുടെ പരാതി.
ഇതുമായി ബന്ധപ്പെട്ട് ഇരുകൂട്ടരെയും പോലീസ് സ്റ്റേഷനിലേക്ക് വിളിപ്പിച്ച്‌ പ്രശ്നം രമ്യമായി പരിഹരിച്ചിരുന്നു. ഇതിന് പിന്നാലെ ചൊവ്വാഴ്ച രാത്രി യുവതി താമസിച്ചിരുന്ന മുറിയിലേക്ക് ജാബിറും സംഘവും അതിക്രമിച്ചുകയറി ഉപദ്രവിക്കുകയായിരുന്നെന്നാണ് പരാതി. യുവതിക്കും കൂടെയുണ്ടായിരുന്ന അക്രം, സഫറാസ് എന്നിവര്‍ക്കും മര്‍ദനത്തില്‍ പരിക്കേറ്റു.മൊബൈല്‍ ഫോണും വാതിലും തകര്‍ത്ത നിലയിലാണ്. പരാതിയില്‍ പത്തോളം പേര്‍ക്കെതിരെ കേസെടുത്തതായി എസ്.എച്ച്‌.ഒ എം.കെ ഷാജി അറിയിച്ചു.
