കരിപ്പൂര്‍: സൗദി അറേബ്യയുമായി പുതിയ എയര്‍ ബബ്ള്‍ കരാര്‍ നിലവില്‍ വന്നതോടെ കോഴിക്കോട് വിമാനത്താവളത്തില്‍ നിന്ന് ജനുവരി 11 മുതല്‍ സര്‍വിസുകള്‍ തുടങ്ങും. നിലവില്‍ ചാര്‍ട്ടര്‍ സര്‍വിസുകളാണ് സൗദി സെക്ടറിലുള്ളത്. പ്രവാസികളുടെ ഭാഗത്ത് നിന്നുള്ള നിരന്തര ആവശ്യത്തിന് ഒടുവിലാണ് സൗദിയുമായി എയര്‍ ബബ്ള്‍ കരാറിലെത്തിയത്. ഇതുപ്രകാരം 11 മുതല്‍ ഫ്ലൈ നാസും ഇന്‍ഡിഗോയുമാണ് സര്‍വിസ് നടത്തുക. ഫ്ലൈ നാസ് റിയാദിലേക്കും ഇന്‍ഡിഗോ ജിദ്ദ, ദമ്മാമിലേക്കുമാണ് സര്‍വിസ്. കോവിഡിന് മുമ്പ് നിര്‍ത്തിയ സര്‍വിസാണ് ഫ്ലൈ നാസ് പുനരാരംഭിക്കുന്നത്. റിയാദ് സെക്ടറില്‍ ആഴ്ചയില്‍ മൂന്ന് സര്‍വിസാണ് നടത്തുക. ചൊവ്വ, വെള്ളി, ഞായര്‍ ദിവസങ്ങളില്‍ രാവിലെ 7.30 ന് റിയാദില്‍ നിന്നെത്തുന്ന വിമാനം 8.30 ന് മടങ്ങും. ജിദ്ദ, ദമ്മാം, മദീന, ജിസാന്‍, അബഹ, അല്‍ഹസ തുടങ്ങിയ പ്രധാന നഗരങ്ങളിലേക്ക് എല്ലാം ഈ സര്‍വിസിന് കണക്ഷന്‍ വിമാനം ലഭിക്കുമെന്നും ഫ്ലൈ നാസ് അധികൃതര്‍ അറിയിച്ചു.
ജിദ്ദയിലേക്ക് തിങ്കള്‍ ഒഴികെയുള്ള ദിവസങ്ങളില്‍ രാത്രി 9.30നാണ് ഇന്‍ഡിഗോ സര്‍വിസ്. രാവിലെ 10.40ന് തിരിച്ചെത്തും. ചൊവ്വ, വ്യാഴം, ശനി ദിവസങ്ങളില്‍ ദമ്മാമില്‍ നിന്ന് 7.35ന് എത്തുന്ന വിമാനം 8.35ന് മടങ്ങും. നിലവില്‍ ചാര്‍ട്ടര്‍ സര്‍വിസുകളാണ് നടത്തുന്നതെന്നും എയര്‍ ബബ്ള്‍ കരാര്‍ പ്രകാരമുള്ള സര്‍വിസുകള്‍ സംബന്ധിച്ച്‌ തീരുമാനമായിട്ടില്ലെന്നും സ്പൈസ് ജെറ്റ് അറിയിച്ചു. സൗദി യാത്രക്ക് 72 മണിക്കൂര്‍ മുമ്ബുള്ള ആര്‍.ടി.പി.സി.ആര്‍ സര്‍ട്ടിഫിക്കറ്റ് വേണം. മുഖീം പോര്‍ട്ടലില്‍ രജിസ്റ്റര്‍ ചെയ്യണം. കരിപ്പൂരില്‍ നിന്ന് ഏറ്റവും തിരക്കേറിയ സൗദി സെക്ടറില്‍ വലിയ വിമാനമില്ലാത്തത് വിദേശയാത്രികര്‍ക്ക് കനത്ത തിരിച്ചടിയാണ്. നേരത്തെ, സൗദി എയര്‍ലൈന്‍സ് സര്‍വിസ് നടത്തിയിരുന്നെങ്കിലും വിമാനാപകട പശ്ചാത്തലത്തില്‍ നിയന്ത്രണം ഏര്‍പ്പെടുത്തുകയായിരുന്നു.
