പത്തനംതിട്ട : മെമ്പർഷിപ്പ് പ്രവർത്തനം വിപുലീകരിച്ച് കേരള കോൺഗ്രസ് പാർട്ടിയെ പഴയ പ്രതാപത്തിലേക്ക് കൊണ്ടുവരണമെന്നും ജനഹിതം മാനിക്കാതെ കെ-റെയിൽ പദ്ധതി ഏകപക്ഷീയമായി നടപ്പിലാക്കുവാൻ ശ്രമിച്ചുകൊണ്ടിരിക്കുന്ന ഗവൺമെൻ്റ് ജനവികാരം മാനിച്ച് കെ-റെയിൽ പദ്ധതി ഉപേക്ഷിക്കണമെന്നും കേരള കോൺഗ്രസ് സംസ്ഥാന ഡെപ്യൂട്ടി ചെയർമാൻ ജോണി നെല്ലൂർ ആവശ്യപ്പെട്ടു. ഒരു കാരണവശാലും കെ- റെയിൽ പദ്ധതി കേരളത്തിൽ നടപ്പിലാക്കാൻ കേരള കോൺഗ്രസും യു.ഡി എഫും അനുവദിക്കുകയില്ല.
കേരളത്തെ കലാപ ഭൂമി ആക്കി മാറ്റുവാനും ചോരപ്പുഴ ഒഴുക്കുവാനുള്ള നീക്കത്തിൽ നിന്നും ബന്ധപ്പെട്ടവർ പിൻതിരിയണമെന്നും കൊലക്കത്തി താഴെയിട്ട് സമാധാനം പുന:സ്ഥാപിക്കണമെന്നും അദ്ദേഹം പറഞ്ഞു. കേരള കോൺഗ്രസ് ജില്ലതലാ മെമ്പർഷിപ്പ് ക്യാമ്പയിനും നേതൃയോഗവും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കേരള കോൺഗ്രസ് ജില്ല പ്രസിഡൻ്റ് വിക്ടർ ടി തോമസ് അദ്ധ്യക്ഷത വഹിച്ചു. പാർട്ടി സംസ്ഥാന ഭാരവാഹികളായ ജോസഫ് എം. പുതുശ്ശേരി, പ്രൊഫ. ഡി. കെ ജോൺ, ജോൺ കെ. മാത്യൂസ്, ഏബ്രഹാം കലമണ്ണിൽ, അഡ്വ. വർഗീസ് മാമ്മൻ, കുഞ്ഞുകോശി പോൾ, അഡ്വ. എൻ. ബാബു വർഗീസ്, ജോർജ്ജ് കുന്നപ്പുഴ, ദീപു ഉമ്മൻ, റോയി ചാണ്ടപ്പിള്ള, തോമസ് മാത്യൂ, ജോർജ്ജ് വർഗീസ് കൊപ്പാറ, കെ. വി കുറിയക്കോസ്, ജോസ് കെ. എസ്, രാജു പുളിംമ്പള്ളിൽ, ബിനു കുരുവിള എന്നീവർ പ്രസംഗിച്ചു.
