കോഴിക്കോട് : കുതിരവട്ടം ഗവ.മാനസികാരോഗ്യ കേന്ദ്രത്തില് മഹാരാഷ്ട്ര സ്വദേശിനിയെ ദുരൂഹ സാചര്യത്തില് മരിച്ച നിലയില് കണ്ടെത്തി. ജിയ റാം ജിലോട്ട് (30) ആണ് മരിച്ചത്. ദേഹത്തു പരുക്കുകള് കാണപ്പെട്ടതിനെ തുടര്ന്നു മൃതദേഹം പോസ്റ്റ്മോര്ട്ടത്തിനായി മെഡിക്കല് കോളജ് ആശുപത്രിയിലേക്കു മാറ്റി. ഇന്നലെ രാവിലെ അഞ്ചരയോടെ സെല്ലില് പതിവുപരിശോധനയ്ക്കു ഡോക്ടര് എത്തിയപ്പോഴാണു യുവതിയെ മരിച്ച നിലയില് കണ്ടെത്തിയത്. മാനസികാരോഗ്യ കേന്ദ്രത്തിലെ മറ്റൊരു അന്തേവാസിനിയും ഇവരുമായി തലേന്നു വഴക്കുണ്ടായിരുന്നതായി അധികൃതര് പറയുന്നു. ഒരേ സെല്ലിലുണ്ടായിരുന്ന കൊല്ക്കത്ത സ്വദേശിനിയും ജിയയുമായാണ് ബുധനാഴ്ച വൈകിട്ട് അടിപിടിയുണ്ടായത്. കൊല്ക്കത്ത സ്വദേശിനിക്ക് പരുക്കേറ്റതിനെ തുടര്ന്ന് ജിയയെ അഞ്ചാം വാര്ഡിലെ പത്താം നമ്പര് സെല്ലിലാക്കി.
മൃതദേഹത്തില് തലയുടെ പിന്നില് ശക്തമായ അടിയേറ്റ മുഴയുണ്ട്. കഴുത്തില് നഖത്തിന്റെ പാടുകളുമുണ്ട്. മൂക്കില് നിന്നും ചെവിയില് നിന്നും രക്തം ഒഴുകിയിരുന്നു. അസ്വാഭാവിക മരണത്തിനു മെഡിക്കല് കോളജ് പോലീസ് കേസെടുത്തു. കഴിഞ്ഞ മാസം അവസാനമാണ് ജിയയെ തലശ്ശേരി മഹിളാമന്ദിരത്തില്നിന്നു കുതിരവട്ടം മാനസികാരോഗ്യ കേന്ദ്രത്തില് പ്രവേശിപ്പിച്ചത്. കുഞ്ഞിനെയും കൊണ്ടു തലശ്ശേരിയില് അലഞ്ഞുതിരിയുകയായിരുന്നു. കുഞ്ഞിനെ അടിക്കുന്നതു കണ്ടു പോലീസ് ഇടപെട്ടാണു ജിയയെ മഹിളാമന്ദിരത്തിലും കുട്ടിയെ ബാലമന്ദിരത്തിലും പ്രവേശിപ്പിച്ചത്. മഹാരാഷ്ട്രയില് വച്ചു തലശ്ശേരി സ്വദേശിയെ വിവാഹം കഴിച്ചുവെന്നും, ആ ബന്ധത്തില് ഒരു കുഞ്ഞുണ്ടായ ശേഷം അയാള് ഉപേക്ഷിച്ചു പോയെന്നുമാണു ജിയ നല്കിയ മൊഴി. ഭര്ത്താവിനെ അന്വേഷിച്ചാണു തലശ്ശേരിയിലെത്തിയത്. മഹിളാമന്ദിരത്തില് മാനസികാസ്വാസ്ഥ്യം പ്രകടിപ്പിച്ചതിനെ തുടര്ന്ന് ജിയയെ അവിടെ നിന്നു കുതിരവട്ടം മാനസികാരോഗ്യ കേന്ദ്രത്തിലേക്ക് മാറ്റുകയായിരുന്നു.