കൊച്ചി : പ്രസ് ക്ലബ് സര്ക്കാര് ഫണ്ടു വെട്ടിപ്പു കേസില് കെയുഡബ്ല്യൂജെക്കു വേണ്ടി അഡ്വ.തമ്പാന് തോമസ് ഹൈക്കോടതിയില് സമര്പ്പിച്ച എതിര് സത്യവാങ്മൂലം കേവലം രാഷ്ട്രീയ പ്രസംഗമാണെന്നു അഡ്വ. കൃഷ്ണരാജ് ഹൈക്കോടതിയില് സമര്പ്പിച്ച മറുപടിയില് പരിഹസിച്ചു. സര്ക്കാര് രേഖകള് സഹിതം സമര്പ്പിച്ച ഹര്ജിയില് ഉന്നയിച്ചിരിക്കുന്ന ആരോപണങ്ങള്ക്കൊന്നും മറുപടി പറയാതെയാണ് എതിര് സത്യവാങ്മൂലം സമര്പ്പിച്ചതെന്നു കൃഷ്ണരാജ് ചൂണ്ടിക്കാട്ടി. സര്ക്കാര് ഫണ്ടു വെട്ടിപ്പു സംബന്ധിച്ചു മറുപടിയോ വിശദീകരണമോ നല്കാന് കെയുഡബ്ല്യൂജെക്കു കഴിഞ്ഞിട്ടില്ല.
കെയുഡബ്ല്യൂജെയുടെ ജില്ലാ ഘടകങ്ങളായ പ്രസ് ക്ലബുകള് വിവിധ പദ്ധതികള്ക്കായി കൈപ്പറ്റിയ സര്ക്കാര് ഫണ്ടുകള് ദുര്വിനിയോഗം ചെയ്തതായി വെളിപ്പെടുത്തുന്ന സര്ക്കാര് രേഖകള് കോടതിയില് സമര്പ്പിച്ചിരുന്നു. സര്ക്കാര് ഫണ്ട് വിനിയോഗ സര്ട്ടിഫിക്കറ്റ് സമര്പ്പിക്കാന് പ്രസ് ക്ലബുകള്ക്ക് സര്ക്കാര് ആവര്ത്തിച്ചു നിര്ദ്ദേശം നല്കിയിട്ടും പ്രസ് ക്ലബുകള് സഹകരിച്ചിട്ടില്ലെന്നു രേഖകള് വ്യക്തമാക്കുന്നുണ്ടെന്നും കൃഷ്ണരാജ് ചൂണ്ടിക്കാട്ടി.
കെയുഡബ്ല്യൂജെ സമര്പ്പിച്ച മറുപടിയില് ഹര്ജി കെയുഡബ്ല്യൂജെയെ പിളര്ക്കാനുള്ള ശ്രമമാണെന്നാണു വാദിക്കുന്നത്. സര്ക്കാര് ഫണ്ട് ദുര്വിനിയോഗ ആരോപണങ്ങളെ കുറിച്ചു മറുപടിയൊന്നും നല്കാന് കെയുഡബ്ല്യൂജെക്കു കഴിഞ്ഞില്ല. ചീഫ് ജസ്റ്റിസ് മണികുമാറും ജസ്റ്റിസ് ഷാജി പി.ചാലിയും ഉള്പ്പെട്ട ബഞ്ചാണ് കേസ് പരിഗണിച്ചത്. കേസില് മറുപടി സമര്പ്പിക്കാന് കേരള സര്ക്കാര് അഭിഭാഷകര് സമയം ആവശ്യപ്പെട്ടതു പരിഗണിച്ചു കേസ് മറ്റൊരു ദിവസത്തേക്ക് മാറ്റി വച്ചു.