തിരുവനന്തപുരം : കെ റെയില്‍ നടപ്പിലാക്കാന്‍ യാതൊരു കാരണവശാലും കേന്ദ്രം അനുമതി നല്‍കില്ലെന്നറിഞ്ഞിട്ടും കമ്മീഷന്‍ തട്ടിയെടുക്കാനുള്ള ശ്രമങ്ങളാണ് മുഖ്യമന്ത്രി പിണറായി വിജയനും പാര്‍ട്ടിയും നടത്തുന്നതെന്ന് കേന്ദ്രമന്ത്രി വി മുരളീധരന്‍. ‘നടപ്പിലാകില്ലെന്ന് അറിയാമെങ്കിലും കമ്മീഷന്‍ വാങ്ങിപ്പോയതിനാല്‍ എന്തെങ്കിലും ചെയ്യുന്നുണ്ടെന്ന് വരുത്തിത്തീര്‍ക്കാനുള്ള ശ്രമമാണെന്നും അദ്ദേഹം ആരോപിച്ചു.
ജനങ്ങളുടെ പ്രതിഷേധം കണക്കിലെടുത്ത് സാമൂഹ്യാഘാത പഠനം നടത്താന്‍ സാധിക്കില്ലെന്നാണ് ഏജന്‍സി പറയുന്നത്. എന്നാല്‍ എന്തുവന്നാലും പദ്ധതി നടപ്പിലാക്കുമെന്നാണ് സര്‍ക്കാര്‍ വാശിപ്പിടിക്കുന്നത്. ജനങ്ങളുടെ താത്പര്യം മുന്‍നിര്‍ത്തിയല്ല സര്‍ക്കാര്‍ പദ്ധതി കൊണ്ടുവരുന്നതെന്ന് വിലയിരുത്തേണ്ടി വരും. സാമൂഹ്യാഘാത പഠനം നടത്താന്‍ സാധിക്കാത്ത സാഹചര്യമാണെങ്കില്‍ പദ്ധതി നിര്‍ത്തി വയ്ക്കുകയാണ് ചെയ്യേണ്ടത്. പദ്ധതിയ്ക്ക് കേന്ദ്രം ഒരിക്കലും അനുമതി നല്‍കില്ലെന്നും’ വി മുരളീധരന്‍ പറഞ്ഞു.
