കോതമംഗലം : വള്ളം മറിഞ്ഞ് അന്തര്‍ സംസ്ഥാന തൊഴിലാളി മരിച്ചു. ഇഞ്ചത്തൊട്ടിയില്‍ തൂക്കുപാലത്തിന് സമീപം ഫൈബര്‍ വള്ളം മറിഞ്ഞ് അന്തര്‍ സംസ്ഥാന തൊഴിലാളി മരിച്ചു. തിങ്കളാഴ്ച്ച രാവിലെ 11 മണിയോടെയായിരുന്നു സംഭവം. അസം സ്വദേശി ജീവയാണ് മരിച്ചത്. കോതമംഗലം സ്കൂബ ടീം സ്ഥലത്ത് എത്തി ഒരു മണിക്കൂറോളം തെരച്ചില്‍ നടത്തിയതിന് ശേഷമാണ് മൃതദേഹം കണ്ടെത്തിയത്.
മൂന്ന് പേരാണ് ഫൈബര്‍ വള്ളത്തില്‍ ഉണ്ടായിരുന്നത്. പ്രദേശവാസിയായ വര്‍ഗീസിനും മറ്റൊരു അന്തര്‍ സംസ്ഥാന തൊഴിലാളിക്കുമൊപ്പം ഫൈബര്‍ വെള്ളത്തില്‍ യാത്ര ചെയ്യുന്നതിനിടയിലാണ് അപകടം. ഒപ്പമുണ്ടായിരുന്ന രണ്ട് പേര്‍ നീന്തി രക്ഷപ്പെട്ടു. അപസ്മാരം ഉണ്ടായതാണ് അപകടത്തിന് കാരണമെന്ന് ഒപ്പമുണ്ടായിരുന്ന് വര്‍ഗീസ് പറഞ്ഞു. സുരക്ഷാ മുന്നറിയിപ്പുകള്‍ അവഗണിക്കുന്നതാണ് അപകടത്തിന് കാരണമെന്ന് കോതമംഗലം അഗ്നി രക്ഷാ നിലയം ഓഫീസര്‍ കരുണാകരന്‍ പിള്ള പറഞ്ഞു.
