ചാവക്കാട് : തെക്കന്‍ പാലയൂരില്‍ പത്താഴകുഴിയിലെ ചെളിയില്‍ വീണ് മരിച്ച വിദ്യാര്‍ഥികളുടെ കുടുംബാംഗങ്ങളെ ആശ്വസിപ്പിക്കാന്‍ റവന്യൂ മന്ത്രി കെ.രാജന്‍ എത്തി. സര്‍ക്കാരിന് ചെയ്യാന്‍ കഴിയുന്ന പരമാവധി സഹായം കുടുംബാംഗങ്ങള്‍ക്ക് എത്തിക്കുമെന്ന് മന്ത്രി ഉറപ്പ് നല്‍കി. വിഷയം മന്ത്രിസഭായോഗത്തില്‍ ഉന്നയിക്കും. തദ്ദേശ സ്വയംഭരണ സ്ഥാപനങ്ങളുമായും ജനപ്രതിനിധികളുമായും കൂടിയാലോചിച്ച്‌ അപകട സാധ്യതയുള്ള സ്ഥലങ്ങളില്‍ മുന്നറിയിപ്പ് ബോര്‍ഡുകള്‍ സ്ഥാപിക്കാന്‍ വേണ്ട നടപടികള്‍ സ്വീകരിക്കുമെന്നും മന്ത്രി പറഞ്ഞു. ഇത്തരം ദുരന്തങ്ങള്‍ ആവര്‍ത്തിക്കാതിരിക്കാന്‍ ഉദ്യോഗസ്ഥരുമായി കൂടിയാലോചിച്ച്‌ വേണ്ട മുന്‍കരുതലുകള്‍ സ്വീകരിക്കും.
നിലവില്‍ നടന്ന സംഭവങ്ങളെ സംബന്ധിച്ചും മരിച്ച കുട്ടികളുടെ കുടുംബാംഗങ്ങളുടെ വിശദാംശങ്ങളും സംബന്ധിച്ചും എത്രയും പെട്ടെന്ന് റിപ്പോര്‍ട്ട് നല്‍കാന്‍ കലക്ടര്‍ക്ക് നിര്‍ദ്ദേശം നല്‍കിയിട്ടുണ്ട്. റിപ്പോര്‍ട്ട് കിട്ടുന്ന മുറക്ക് വേണ്ട നടപടികള്‍ സ്വീകരിക്കുമെന്നും മന്ത്രി പറഞ്ഞു. മന്ത്രിക്കൊപ്പം എന്‍.കെ. അക്ബര്‍ എം.എല്‍.എ, തഹസില്‍ദാര്‍ ടി.കെ. ഷാജി, നഗരസഭാ ചെയര്‍പേഴ്സണ്‍ ഷീജ പ്രശാന്ത്, വൈസ് ചെയര്‍മാന്‍ കെ.കെ. മുബാറക്, സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ പ്രസന്ന രണദേവ, ബുഷറ ലത്തീഫ്, എ.ഡി.എം റെജി പി. ജോസഫ്, നഗരസഭ കൗണ്‍സിലര്‍മാര്‍, ജനപ്രതിനിധികള്‍ തുടങ്ങിയവരും മന്ത്രിക്കൊപ്പം എത്തിയിരുന്നു. ഏപ്രില്‍ 28നാണ് ചാവക്കാട് പത്താഴകുഴിയില്‍ താഴ്ന്ന് വിദ്യാര്‍ഥികളായ വരുണ്‍, മുഹസീന്‍, സൂര്യ എന്നിവര്‍ മരിച്ചത്.
