കണ്ണൂര് : കഞ്ചാവ് ശേഖരവും ഹെറോയിനുമായി മയക്കുമരുന്ന് സംഘത്തിന്റെ കാരിയര്മാരായി പ്രവര്ത്തിച്ചു വരുന്ന രണ്ട് ഇതര സംസ്ഥാന തൊഴിലാളികളെ എക്സൈസ് പിടികൂടി. ഒരു കിലോ 150 ഗ്രാം കഞ്ചാവ് ശേഖരവുമായി പശ്ചിമബംഗാള് മൂര് ശിദ ബദ് മഹേ ഷലി സ്വദേശി അലമഗീര് (32) മൂന്ന് ഗ്രാം ഹൊ റോയിനും 20 ഗ്രാം കഞ്ചാവുമായി പശ്ചിമബംഗാള് സുട്ടി സ്വദേശി മസും രാണ (22) എന്നിവരെയാണ് റെയ്ഞ്ച് എക്സൈസ് ഇന്സ്പെക്ടര് എന് വൈശാഖും സംഘവും അറസ്റ്റു ചെയ്തത്.
പയ്യന്നൂര് പെരുമ്പ കോറോം റോഡില് വെച്ചാണ് ഇരുവരും എക്സൈസ് സംഘത്തിന്റെ പിടിയിലായത്. അന്തര്സംസ്ഥാന മയക്കുമരുന്ന് സംഘത്തിന്റെ കാരിയര്മാരായി പ്രതികള് പ്രവര്ത്തിച്ചു വരികയായിരുന്നുവെന്ന് എക്സൈസ് അറിയിച്ചു. എക്സൈസ് സൈബര് സെലിന്റെ സഹായത്തോടെ കഴിഞ്ഞ ഒരു മാസമായി ഇതര സംസ്ഥാന തൊഴിലാളികളുടെ നീക്കങ്ങള് നിരീക്ഷിച്ചു വരികയായിരുന്നു. അന്വേഷണത്തിന് പ്രിവന്റിവ് ഓഫീസര്മാരായ പി വി ശ്രീനിവാസന്, വി മനോജ്, എന് വിജിത്ത്, ടി വി സനേഷ്, സനലേഷ് എന്നിവര് പങ്കെടുത്തു.
