ന്യൂഡല്ഹി : തെക്കുകിഴക്കന് ബംഗാള് ഉള്ക്കടലില് രൂപപ്പെട്ട ന്യൂനമര്ദം അസാനി ചുഴലിക്കാറ്റായി രൂപപ്പെട്ടു. ചുഴലിക്കാറ്റ് ചൊവ്വാഴ്ച ഒഡീഷ, ബംഗാള്, ആന്ധ്ര തീരംതൊടും. ഈ വര്ഷം വടക്കേ ഇന്ത്യന് മഹാസമുദ്രത്തില് രൂപപ്പെടുന്ന ആദ്യത്തെ കൊടുങ്കാറ്റാണിത്. ഈ സംസ്ഥാനങ്ങളില് ഇടിമിന്നലോടു കൂടിയ ശക്തമായ മഴയുണ്ടാകുമെന്ന് കാലാവസ്ഥ വകുപ്പ് മുന്നറിയിപ്പ് നല്കി. ചുഴലിക്കാറ്റിന്റ ഭാഗമായി കേരളം ഉള്പ്പെടെയുള്ള ദക്ഷിണേന്ത്യന് സംസ്ഥാനങ്ങളില് ഇടിയോടു കൂടിയ മഴക്ക് സാധ്യതയുണ്ട്. അസാനി എന്ന വാക്കിനര്ഥം ‘ഉഗ്രകോപി’ എന്നാണ്. ശ്രീലങ്കയാണ് കാറ്റിന് പേരിട്ടത്.
അസാനി ചുഴലിക്കാറ്റിന്റെ സഞ്ചാരപാത കേരളത്തെ നേരിട്ട് ബാധിക്കില്ല. എങ്കിലും സംസ്ഥാനത്ത് ഞായറാഴ്ച മഴക്ക് സാധ്യതയുണ്ട്. ഇടിമിന്നലോടും കാറ്റോടും കൂടിയ മഴക്കാണ് സാധ്യത. കിഴക്കന് മേഖലകളില് കൂടുതല് മഴ കിട്ടും. ബംഗാള് ഉള്ക്കടലില് മത്സ്യബന്ധനത്തിന് പോയവര് സുരക്ഷിത തീരങ്ങളിലേക്ക് മാറണമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ അറിയിപ്പ്. അസാനി ചുഴലിക്കാറ്റിന്റെ പശ്ചാത്തലത്തില് ആന്ധ്ര, ഒഡീഷ തീരങ്ങളില് മഴ മുന്നറിയിപ്പ് പുറപ്പെടുവിച്ചിട്ടുണ്ട്. തിങ്കളാഴ്ച വൈകിട്ടോടെ അസാനി ആന്ധ്ര, ഒഡീഷ തീരത്തേക്ക് അടുക്കുമെങ്കിലും കരതൊടാതെ കടന്നുപോകും. തീരമേഖലയില് നിന്ന് ആളുകളെ മാറ്റിപാര്പ്പിച്ചു തുടങ്ങി.