കൊച്ചി : ശക്തമായ മഴയില്‍ സംസ്ഥാനത്ത് ഇടുക്കിയടക്കമുള്ള സംഭരണികളില്‍ ജലനിരപ്പ് ഉയരുകയാണ്. ഇടുക്കി പാമ്പള ഡാമിന്റെ ഷട്ടറുകള്‍ ഉടന്‍ തുറക്കുമെന്ന് അറിയിച്ചു. പെരിങ്ങല്‍ക്കൂത്ത് ഡാമില്‍ റെഡ് അലേര്‍ട്ടും പ്രഖ്യാപിച്ചു. ഡാമിന്റെ പരമാവധി സംഭരണശേഷിയായ 253 മീറ്ററിലേക്ക് ജലനിരപ്പ് ഉയരുന്ന സാഹചര്യത്തിലാണ് പാമ്ബളയില്‍ ഷട്ടറുകള്‍ തുറക്കാന്‍ തീരുമാനിച്ചത്. ആവശ്യാനുസരണം ഷട്ടറുകള്‍ ഉയര്‍ത്തി 500 ക്യുമെക്‌സ് വെള്ളം പുറത്തേക്കൊഴുക്കും. പെരിയാറിന്റെ തീരത്തുള്ളവര്‍ ജാഗ്രത പാലിക്കണമെന്ന് ജില്ലാ കളക്ടര്‍ നിര്‍ദ്ദേശം നല്‍കി.
പെരിങ്ങല്‍ക്കൂത്ത് ഡാമില്‍ റെഡ് അലേര്‍ട്ട് പ്രഖ്യാപിച്ചു. മണലി, ചാലക്കുടി പുഴയില്‍ ജലനിരപ്പ് ഉയരാന്‍ സാധ്യതയുണ്ടെന്നും തീരത്തുള്ള ജനങ്ങള്‍ ജാഗ്രത പാലിക്കണമെന്നും ജില്ലാ ഭരണകൂടം നിര്‍ദ്ദേശിച്ചു. ഇന്നലെ രാവിലെ രേഖപ്പെടുത്തിയ കണക്ക് പ്രകാരം ഇടുക്കിയില്‍ 2340.36 അടി വെള്ളമാണുള്ളത്, സംഭരണ ശേഷിയുടെ 37.75ശതമാനമാണ് ജലനിരപ്പ്.
കഴിഞ്ഞ വര്‍ഷം ഇതേ സമയത്തേക്കാള്‍ 3 ശതമാനത്തോളം വെള്ളം കൂടുതലാണ് ഇത്തവണ. പൊതുവെയുളള മഴയ്‌ക്ക് നേരിയ ആശ്വാസമുണ്ടായെങ്കിലും വൃഷ്ടിപ്രദേശത്ത് ഉള്‍പ്പെടെ മഴ ഇപ്പോഴും തുടരുകയാണ്. മഴക്കാലം എത്തുന്നതിനാല്‍ ചെറിയ അണക്കെട്ടുകളിലെ വെള്ളം പരമാവധി കുറച്ച്‌ നിര്‍ത്താനുള്ള ശ്രമത്തിലാണ് വൈദ്യുതി- ജലസേചന വകുപ്പുകള്‍. ഇടുക്കിയിലും മുല്ലപ്പെരിയാറിലും ജലനിരപ്പുയരുന്നുണ്ട്.
