കൊച്ചി : തൃക്കാക്കര ഉപതിരഞ്ഞെടുപ്പില് ഒരു മുന്നണിയെയും പിന്തുണയ്ക്കുന്നില്ലെന്ന് ട്വന്റി ട്വന്റി- ആം ആദ്മി സഖ്യം. ട്വന്റി ട്വന്റി ചീഫ് കോ-ഓര്ഡിനേറ്റര് സാബു എം ജേക്കബ്, എഎപി സംസ്ഥാന കണ്വീനര് പി സി സിറിയക് എന്നിവര് ചേര്ന്ന് നടത്തിയ വാര്ത്താസമ്മേളനത്തില് ഇക്കാര്യം അറിയിക്കുകയായിരുന്നു. ഏത് മുന്നണി വിജയിച്ചാലും കേരളത്തിന്റെ സാമൂഹിക സാമ്പത്തിക നിലയില് മാറ്റമുണ്ടാകാന് പോകുന്നില്ല. ഇക്കാരണത്താലാണ് ആര്ക്കും പിന്തുണ നല്കാത്തതെന്ന് സാബു എം ജേക്കബ് പറഞ്ഞു.
‘തൃക്കാക്കരയില് സ്ഥാനാര്ത്ഥിയില്ലെങ്കിലും ട്വന്റി ട്വന്റി – ആം ആദ്മി സഖ്യം നിര്ണായക ശക്തിയായി മാറിക്കഴിഞ്ഞു. പരമ്പരാഗതമായ രാഷ്ട്രീയ സംവിധാനങ്ങളില് നിന്ന് വ്യത്യസ്തമായി പ്രവര്ത്തിക്കുന്നവരാണ് ഞങ്ങള്. ജനങ്ങള് കാര്യങ്ങള് ശരിയായി വിലയിരുത്തി വിവേകത്തോടെ വോട്ട് ചെയ്യണം’- ട്വന്റി ട്വന്റി – ആം ആദ്മി നേതാക്കള് പറഞ്ഞു.