പാലക്കാട്: സ്വകാര്യ ബസ്സുകളും ടോള്‍ കമ്പിനിയും തമ്മിലുള്ള തര്‍ക്കം മൂലം പന്നിയങ്കര ടോള്‍ പ്ളാസയില്‍ യാത്രക്കാര്‍ വലയുന്നു. ഇന്നു മുതല്‍ ടോള്‍ നല്‍കാതെ ബസ്സുകള്‍ കടത്തിവിടില്ലെന്ന നിലപാടിലാണ് കമ്പിനി. ഇതില്‍ പ്രതിഷേധിച്ച്‌ ബസ്സുകള്‍ ടോള്‍ പ്ലാസയില്‍ സര്‍വ്വീസ് അവസാനിപ്പിച്ച്‌ യാത്രക്കാരെ ഇറക്കിവിടുകയാണ്. ഇന്നു മുതല്‍ ടോള്‍ പിരിവ് നടപ്പിലാക്കാന്‍ തീരുമാനിച്ചത് ഹൈക്കോടതി ഉത്തരവനുസരിച്ചാണ്.
കമ്പിനിയുടെ നിലപാട് പ്രതിമാസം 50 ട്രിപ്പുകള്‍ക്ക് 10500 രൂപ നല്‍കണമെന്നാണ്. ട്രിപ്പുകളുടെ എണ്ണം നിജപ്പെടുത്തരുതെന്നും ഇത് അംഗീകരിക്കാനാകില്ലെന്നും ബസ്സുടമകള്‍ അറിയിച്ചു. പ്രതിഷേധത്തിന് വഴിവച്ചിരിക്കുന്നത് ഇതാണ്. ഹൈക്കോടതി പുതുക്കിയ നിരക്കില്‍ ടോള്‍ പിരിക്കുന്നത് തടഞ്ഞിരുന്നു. ഹൈക്കോടതി സിംഗില്‍ ബെഞ്ചിന്റെ ഉത്തരവ് പഴയ നിരക്കില്‍ ടോള്‍ പിരിക്കണം എന്നാണ്. ടോള്‍ പിരിക്കാന്‍ പോലീസ് സംരക്ഷണം ആവശ്യപ്പെട്ട് ടോള്‍ കമ്പിനി ഹര്‍ജി നല്‍കിയിരുന്നു.
