ആലപ്പുഴ : കായംകുളത്ത് ദമ്പതികള്‍ എംഡിഎംഎയുമായി പിടിയിലായ കേസില്‍ ലഹരി മരുന്ന് കൈമാറിയവരും പിടിയില്‍. ദക്ഷിണാഫ്രിക്കന്‍ പൗരനും കാസര്‍ഗോഡ് സ്വദേശിയും ആണ് അറസ്‌റ്റില്‍ ആയത്. ഫിലിപ്പ് അനോയിന്റെഡ്, ചെങ്കള സ്വദേശി മുഹമ്മദ് കുഞ്ഞി (34) എന്നിവരെയാണ് കായംകുളം പോലീസ് അറസ്‌റ്റ് ചെയ്‌തത്‌. മെയ് 24നാണ് കായംകുളത്ത് എംഡിഎംഎയുമായി ദമ്പതികള്‍ പിടിയിലാകുന്നത്.
ബെംഗളൂരുവില്‍ നിന്നെത്തിയ മുതുകുളം സ്വദേശികളായ അനീഷും ഭാര്യയുമാണ് പോലീസിന്റെ പിടിയിലായത്. ഇവരുടെ പക്കല്‍ നിന്ന് 67 ഗ്രാം എംഡിഎംഎ പിടിച്ചെടുത്തു. പ്രതികളെ ചോദ്യം ചെയ്തു വരികയാണ്. വെളുപ്പിന് അഞ്ച് മണിയോടു കൂടിയാണ് ദമ്പതികള്‍ കായംകുളത്തെത്തിയത്. എസ്‌പിയുടെ സ്‌പെഷ്യല്‍ സ്‌ക്വാഡിന്‌ ലഭിച്ച രഹസ്യ വിവരത്തിന്റെ അടിസ്‌ഥാനത്തിലാണ് ഇവരെ പിടികൂടിയത്. മാസം തോറും കോടികണക്കിന് രൂപയുടെ മയക്കുമരുന്ന് കച്ചവടമാണ് ഈ സംഘം നടത്തുന്നത്.
ഇവരുടെ ഫോണ്‍ രേഖകളും അക്കൗണ്ട് രേഖകളും പരിശോധിച്ചതില്‍ നിന്ന് ഇവര്‍ വ്യാപകമായി മയക്കുമരുന്ന് നിര്‍മ്മാണത്തിലും കച്ചവടത്തിലും ഏര്‍പ്പെടുന്നതായി പോലീസ് കണ്ടെത്തി. ആലപ്പുഴ ജില്ലാ പോലീസ് മേധാവിയുടെ നിര്‍ദ്ദേശാനുസരണം പ്രതികളെ കസ്‌റ്റഡിയില്‍ വാങ്ങി അന്വേഷണം നടത്തി ഈ മാഫിയയിലുള്ള കൂടുതല്‍ ആള്‍ക്കാരെ കണ്ടെത്തി നടപടി സ്വീകരിക്കുമെന്ന് കായംകുളം പോലീസ് അറിയിച്ചു.
