കണ്ണൂര്‍ : കണ്ണൂര്‍ ജില്ലയിലെ ഒരു ഹയര്‍ സെക്കന്‍ഡറി സ്‌ക്കൂളില്‍ സേപരീക്ഷയ്ക്കിടെ വിദ്യാര്‍ത്ഥിനികള്‍ തമ്മില്‍ ഏറ്റുമുട്ടി. സഹപാഠി മറ്റൊരു വിദ്യാത്ഥിനിയെ ബ്ലേഡ് കൊണ്ട് മുറിവേല്‍പ്പിച്ചുവെന്ന പരാതിയില്‍ പോലിസ്‌കേസെടുത്തു. ബുധനാഴ്ച രാവിലെ 11 മണിയോടെയായിരുന്നു സംഭവം പ്ലസ് ടു ഫിസിക്‌സ് സേപരീക്ഷ നടക്കുന്ന ക്ലാസ് മുറിയിലായിരുന്നു സംഭവം. പരീക്ഷ നടക്കുന്നതിനിടയില്‍ മുന്‍വശത്തെ ബെഞ്ചിലിരിക്കുന്ന പെണ്‍കുട്ടി എന്തോപറഞ്ഞപ്പോള്‍ പ്രകോപിതയായി മാനസീക സമനില തെറ്റിയ നിലയില്‍ പിന്‍ബെഞ്ചിലിരിക്കുകയായിരുന്ന പെണ്‍കുട്ടി അവളെ ബ്ലേഡ് കൊണ്ട് കൈക്കും കഴുത്തിനും മുറിവേല്‍പ്പിക്കുകയായിരുന്നുവെന്നാണ് വിവരം.
മുറിവേറ്റ വിദ്യാര്‍ത്ഥിനി ആശുപത്രിയില്‍ ചികില്‍സ തേടിയ ശേഷം വീട്ടിലേക്ക് പോയി മുറിവേല്‍പ്പിച്ച കുട്ടിയെ കുട്ടികളുടെ മാനസീക ആരോഗ്യ കേന്ദ്രത്തില്‍ എത്തിച്ച്‌ കൗണ്‍സിലിംഗിന് വിധേയമാക്കി. രക്ഷിതാക്കളുടെ പരാതിയില്‍ പൊലിസ് കേസെടുത്തിട്ടുണ്ട്. വിദ്യാര്‍ത്ഥിനികള്‍ തമ്മിലുള്ള തര്‍ക്കമാണ് അക്രമത്തിന് കാരണമെന്നാണ് പോലിസ് പറയുന്നത്.
