അടൂര്‍ : കൊന്നമങ്കരയില്‍ തെരുവുനായ്ക്കളുടെ ശല്യം രൂക്ഷമാകുന്നു. നായ്ക്കളുടെ ശല്യം കാരണം കാല്‍നട യാത്രക്കാരാണ് ഏറെ ബുദ്ധിമുട്ടിലായിരിക്കുന്നത്. അടൂര്‍ പാര്‍ഥസാരഥി – സെന്റ് മേരീസ് റോഡ്, കെഎസ്‌ആര്‍ടിസി – സെന്റ് മേരീസ് റോഡുകളിലാണ് നായ ശല്യം കൂടുതലായിട്ടുള്ളത്. കൂട്ടമായെത്തുന്ന നായ്ക്കള്‍ വീടുകള്‍ക്കു മുമ്പിലും റോഡരികിലുമായി തമ്പടിക്കുകയാണ്.
അഞ്ഞൂറിലധികം കുട്ടികള്‍ പഠിക്കുന്ന സെന്റ് മേരീസ് സ്‌കൂളിലേക്കുള്ള റോഡുകളിലാണ് നായശല്യം കൂടുതലായുള്ളത്. നായ്ക്കളെ ഭയന്ന് കുട്ടികള്‍ വീണു പരിക്കേറ്റ സംഭവങ്ങള്‍ നിരവധിയാണ്. സ്‌കൂള്‍ റോഡില്‍ മിക്ക സമയങ്ങളിലും നായ്ക്കള്‍ കൂട്ടമായി റോഡിന്റെ മധ്യഭാഗങ്ങളില്‍ കിടക്കുന്നത് കാല്‍നടയാത്രക്കാരെയും ഇരുചക്ര വാഹനയാത്രക്കാരെയുമാണ് ഏറെ ബുദ്ധിമുട്ടുന്നത്. അധികൃതര്‍ നടപടികള്‍ കൈക്കൊള്ളണമെന്നാണ് നാട്ടുകാരുടെ ആവശ്യം.
