കല്‍പറ്റ: ജലനിരപ്പ് ഉയര്‍ന്നതോടെ ബാണാസുര സാഗര്‍ അണക്കെട്ട് തുറന്നു. രാവിലെ എട്ടിന് അണക്കെട്ടിന്റെ ഒരു ഷട്ടര്‍ 10 സെന്റിമീറ്ററാണ് ഉയര്‍ത്തിയത്. സെക്കന്‍ഡില്‍ 8.50 ഘനയടി വെള്ളമാണ് പുറത്തേക്ക് ഒഴുക്കുക. ആവശ്യമെങ്കില്‍ 35 ഘനയടി വെള്ളം തുറന്നുവിടാന്‍ അനുമതിയുണ്ട്. അണക്കെട്ടിലെ നിലവിലെ ജലനിരപ്പ് 773.60 മീറ്ററാണ്. 775.600 മീറ്ററാണ് പരമാവധി സംഭരണശേഷി. ജലനിരപ്പ് അപ്പര്‍ റൂള്‍ ലെവല്‍ ആയ 774 മീറ്ററിലേക്ക് ഞായറാഴ്ച രാത്രിയോടെ എത്തിയിരുന്നു. നേരത്തെ, ജലനിരപ്പ് 772.50 മീറ്ററില്‍ എത്തിയതോടെ ബ്ല്യൂ അലര്‍ട്ടും 773 മീറ്ററില്‍ എത്തിയതോടെ ഓറഞ്ച് അലര്‍ട്ടും പുറപ്പെടുവിച്ചിരുന്നു.
അണക്കെട്ടില്‍ നിന്നും ഒഴുകിയെത്തുന്ന വെള്ളം പടിഞ്ഞാറത്തറ, തരിയോട്, പനമരം പഞ്ചായത്തുകളെയാണ് ബാധിക്കുക. ഇവിടെ പ്രത്യേക യോഗം ചേര്‍ന്ന് മുന്‍കരുതല്‍ നടപടികള്‍ സ്വീകരിക്കുകയും ക്യാമ്പുകള്‍ തുറക്കുകയും ചെയ്തിട്ടുണ്ട്. രണ്ട് വര്‍ഷം മുമ്പാണ് അവസാനമായി ബാണാസുര അണക്കെട്ട് തുറന്നത്. ജനങ്ങള്‍ ജാഗ്രത പാലിക്കണമെന്നും വെള്ളം ഒഴുകിപ്പോകുന്ന പുഴകളില്‍ നിന്നും മീന്‍ പിടിക്കുകയോ പുഴയില്‍ ഇറങ്ങുകയോ ചെയ്യരുതെന്നും ജില്ലാ ഭരണകൂടം മുന്നറിയിപ്പ് നല്‍കി.
