തിരുവനന്തപുരം: അഞ്ച് ജില്ലകളില് ദുരിതാശ്വാസ ക്യാമ്പുകളുള്ള വിദ്യാഭ്യാസ സ്ഥാപനങ്ങള്ക്ക് ഇന്ന് അവധി. എറണാകുളം, ഇടുക്കി, തൃശൂര്, പത്തനംതിട്ട, കോട്ടയം ജില്ലകളില് ദുരിതാശ്വാസ ക്യാമ്പുകള് പ്രവര്ത്തിക്കുന്ന വിദ്യാഭ്യാസ സ്ഥാപനങ്ങള്ക്കാണ് അവധി നല്കിയിരിക്കുന്നത്. ദേവികുളം, പീരുമേട്, കുട്ടനാട് താലൂക്കുകളിലും ഇന്ന് അവധിയാണ്. മുല്ലപ്പെരിയാര് അണക്കെട്ടില് ജലനിരപ്പ് 138.40 അടിയായി ഉയര്ന്നിരിക്കുകയാണ്. ഡാമിലേക്കുള്ള നീരൊഴുക്കും വര്ധിച്ചിട്ടുണ്ട്. ഡാമില് നിന്ന് കൂടുതല് വെള്ളം തുറന്നുവിടുന്നുണ്ട്. ജലനിരപ്പ് ഉയര്ന്നതിനെത്തുടര്ന്നാണ് വെള്ളത്തിന്റെ അളവ് കൂട്ടിയത്. സെക്കന്റില് 3119 ഘനയടി ആയാണ് കൂട്ടിയത്. ആറു ഷട്ടറുകള് 50 സെന്റിമീറ്റര് വീതം ഉയര്ത്തിയിട്ടുണ്ട്.
ജലനിരപ്പ് ഉയരുന്ന പശ്ചാത്തലത്തില് കക്കി ആനത്തോട് റിസര്വോയര് ഷട്ടര് ഇന്ന് തുറക്കും. രാവിലെ 11 മണിക്കാണ് ഷട്ടര് തുറക്കുക. 35 മുതല് 50 ക്യുമെക്സ് ജലം പുറത്തേക്ക് വിടുമെന്ന് ജില്ലാ കളക്ടര് അറിയിച്ചു. ഇതോടെ പമ്പയിൽ ജലനിരപ്പ് 10 മുതല് 15 സെന്റിമീറ്റര് വരെ ഉയരും. പമ്പാതീരത്തുള്ളവര് ആവശ്യമെങ്കില് മാറിത്താമസിക്കണമെന്നും നിര്ദേശം നല്കിയിട്ടുണ്ട്.
