കളമശ്ശേരി : വിദ്യാര്ഥികളുടെ ഒത്തുകൂടലും പുകവലിയും ശല്യമായപ്പോള് പല മുന്നറിയിപ്പ് ബോര്ഡും സ്ഥാപിച്ചിട്ടും ഫലം കാണാതെ വന്നതോടെ അവസാനം വീട്ടുകാര് ചാണക ഏറ് ഉറപ്പെന്ന കൗതുകകരമായ ബോര്ഡ് തൂക്കി. എച്ച്.എം.ടി ജങ്ഷന് സമീപം ഒരു വീടിന് മുന്നിലാണ് പുകവലിക്കാരുടെ ശല്യം ഒഴിവാക്കാന് വിചിത്രമായ ബോഡുകള് സ്ഥാപിച്ചിരിക്കുന്നത്.
വീട്ടിലേക്കിറങ്ങുന്ന നടപ്പാതയില് വിദ്യാര്ഥികള് ഒത്തുകൂടി പുകവലിയും ശേഷം അവശിഷ്ടങ്ങള് അവിടെ വലിച്ചെറിയുന്നതും പതിവായി. ഇതിനെതിരെ ഇവിടെ മലിനമാക്കരുത് സഹകരിക്കുക എന്ന ബോഡ് ആദ്യം സ്ഥാപിച്ചു. പിന്നീട് ‘പോലീസിന്റെ സി.സി ടി.വി നിരീക്ഷണത്തിലെന്ന’ മുന്നറിയിപ്പ് തൂക്കി. കൂട്ടത്തില് പുകവലി ആരോഗ്യത്തിന് ഹാനികരമെന്ന ബോധവത്കരണ ബോര്ഡും സ്ഥാപിച്ചു നോക്കി.
ഇതൊന്നും ഫലിക്കാതെ വന്നതോടെയാണ് പുകവലി പാടില്ല, ചാണക ഏറ് ഉറപ്പ് എന്നെഴുതിയ ബോഡ് സ്ഥാപിച്ചത്. നിരവധി വിദ്യാഭ്യാസ സ്ഥാപനങ്ങള് പ്രവര്ത്തിക്കുന്ന പ്രദേശത്ത് പുകയില ഉല്പന്നങ്ങള് വില്പന തകൃതിയാണ്. ഇത് തടയാന് അധികൃതരുടെ ഭാഗത്തുനിന്നും ഒരു നടപടിയും ഇല്ലെന്നാണ് നാട്ടുകാര് പറയുന്നത്.
