മട്ടാഞ്ചേരി : കഴിഞ്ഞ ദിവസം ഉണ്ടായ രൂക്ഷമായ വെള്ളക്കെട്ടില് നഗരസഭയുടെ അനാസ്ഥക്കെതിരെ മുന് ഡി.വൈ.എഫ്.ഐ ബ്ലോക്ക് പ്രസിഡന്റും സി.ഐ.ടി.യു കൊച്ചി ഏരിയ വൈസ് പ്രസിഡന്റുമായ സൈലു കബീര് ഫേസ്ബുക്കിലിട്ട പോസ്റ്റ് ചര്ച്ചാവിഷയമാകുന്നു. വെള്ളക്കെട്ടിനെതിരെ മട്ടാഞ്ചേരി സ്വദേശിനിയായ വീട്ടമ്മയുടെ ലൈവ് പോസ്റ്റിന്റെ സ്ക്രീന്ഷോട്ട് എടുത്ത് അവര്ക്ക് അഭിവാദ്യം അര്പ്പിച്ചാണ് പോസ്റ്റിട്ടിട്ടുള്ളത്.
സി.പി.എം മേയര്, സി.പി.ഐ ഡെപ്യൂട്ടി മേയര്, കോണ്ഗ്രസ്, മുസ്ലിം ലീഗ്, ജനതാദള്, ബി.ജെ.പി എന്നീ സ്റ്റാന്ഡിങ് കമ്മിറ്റി ചെയര്മാന്മാര് എന്നിവര് ഒരുമിച്ചിരുന്ന് കൊച്ചി കോര്പറേഷന് ഭരിച്ച് മുടിക്കുമ്പോള് നഗര വികസനത്തിന് കേന്ദ്ര സര്ക്കാര് അനുവദിച്ച 2500 കോടി രൂപയാണ് ഈ കൂട്ടുകക്ഷി ഭരണം പൊടിപൊടിച്ചത്. തങ്ങള് അനുഭവിക്കുന്ന ദുരിതത്തിനെതിരെ ചങ്കുറപ്പോടെ പ്രതികരിച്ച മട്ടാഞ്ചേരിയുടെ പെണ്കരുത്തിന് ഹൃദയം നിറഞ്ഞ അഭിവാദ്യങ്ങള് എന്നാണ് പോസ്റ്റില് പരാമര്ശിച്ചിട്ടുള്ളത്.
ഇതില് സി.പി.എം കൊച്ചി ഏരിയ കമ്മിറ്റിയംഗവും നഗരസഭ എല്.ഡി.എഫ് പാര്ലമെന്ററി സെക്രട്ടറിയുമായ ബെന്നി ഫര്ണാണ്ടസിനെയും രൂക്ഷമായി വിമര്ശിച്ചിട്ടുണ്ട്. പാര്ട്ടിയുടെ ഒരു ഏരിയ കമ്മിറ്റിയംഗത്തെ അഴിമതി വീരന് എന്ന് പരാമര്ശിച്ചതാണ് കൊച്ചിയില് വിവാദമായിരിക്കുന്നത്. പോസ്റ്റ് വിവാദമായതിനെ തുടര്ന്ന് ഇത് ഡിലീറ്റ് ചെയ്യുകയും ചെയ്തു. എന്നാല്, സ്ക്രീന്ഷോട്ട് ഇപ്പോള് വ്യാപകമായി പ്രചരിക്കുകയാണ്.
