സ്ത്രീകള്‍ മാത്രമുള്ള വീട്ടില്‍ കവര്‍ച്ചയ്‌ക്കെത്തിയയാളെ നാട്ടുകാര്‍ തല്ലിക്കൊന്നു

ചെന്നൈ : സ്ത്രീകള്‍ മാത്രമുള്ള വീട്ടില്‍ കവര്‍ച്ചയ്‌ക്കെത്തിയയാളെ നാട്ടുകാര്‍ തല്ലിക്കൊന്നു. ഒപ്പമുണ്ടായിരുന്ന രണ്ടുപേര്‍ രക്ഷപ്പെട്ടു. തിരുവള്ളൂര്‍ ജില്ലയിലെ ഗുമ്മിഡിപൂണ്ടിയില്‍ ചൊവ്വാഴ്ച പുലര്‍ച്ചെയാണ് സംഭവം. എണ്‍പതു പിന്നിട്ട വടുവമ്മാളും മക്കളായ ചെല്ലമ്മാളും ശാന്തിയും താമസിക്കുന്ന വീട്ടിലാണ് മൂന്നംഗ സംഘം മോഷ്ടിക്കാനെത്തിയത്. ശബ്ദംകേട്ടുണര്‍ന്ന വടുവമ്മാള്‍ മോഷ്ടാക്കളെ തടയാന്‍ ശ്രമിച്ചപ്പോള്‍ അക്രമത്തിനിരയായി. അപ്പോള്‍ ചെല്ലമ്മാളും ശാന്തിയും ശബ്ദമുയര്‍ത്തി. നാട്ടുകാരെത്തിയപ്പോള്‍ മൂന്ന് മോഷ്ടാക്കളും ഓടിരക്ഷപ്പെടാന്‍ ശ്രമിച്ചു. പക്ഷേ അതിലൊരാള്‍ വഴിയിലെ കുഴിയില്‍ വീണുപോയി. ഇയാളെ നാട്ടുകാര്‍ പിടികൂടി കൈകാര്യം ചെയ്തു. പോലീസെത്തി ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. മറ്റു രണ്ടുപേര്‍ രക്ഷപ്പെട്ടു.മരിച്ചയാളെ തിരിച്ചറിഞ്ഞിട്ടില്ലെന്ന് പോലീസ് അറിയിച്ചു.