ആലപ്പുഴ : യുവാവിനെ ആക്രമിച്ച് ബീഫ് ഫ്രൈ തട്ടിയെടുത്ത കേസിൽ രണ്ടുപേർ അറസ്റ്റില്. ആലപ്പുഴ കാർത്തികപ്പള്ളി വിഷ്ണുഭവനം വിഷ്ണു, പിലാപ്പുഴ വലിയ തെക്കതിൽ ആദർശ് എന്നിവരാണ് അറസ്റ്റിലായത്. കാർത്തികപ്പള്ളി പുതുക്കുണ്ടം എരുമപ്പുറത്ത് കിഴക്കതിൽ വിഷ്ണുവിനാണു മർദനമേറ്റത്.
ഹരിപ്പാടുള്ള തട്ടുകടയിൽനിന്ന് സെപ്റ്റംബർ രണ്ടിന് ബീഫ് ഫ്രൈ വാങ്ങി ബൈക്കിൽ പോകാൻ തുടങ്ങിയ വിഷ്ണുവിനെ പ്രതികൾ തടഞ്ഞുനിർത്തി പൈസ ആവശ്യപ്പെടുകയും മർദിക്കുകയും ചെയ്തു. മർദനത്തിൽ അവശനായ വിഷ്ണുവില് നിന്ന് ഇവര് ബീഫ് ഫ്രൈ തട്ടിപ്പറിക്കുക ആയിരുന്നുവെന്ന് പോലീസ് പറയുന്നു. ഒളിവിൽ പോയ പ്രതികളെ ഹരിപ്പാട് സ്റ്റേഷൻ ഹൗസ് ഓഫീസർ വി.എസ്. ശ്യാംകുമാറിന്റെ അന്വേഷണത്തിലാണ് പ്രതികളെ പിടികൂടിയത്.