തിരുവനന്തപുരം : വിഴിഞ്ഞം തുറമുഖ നിര്മാണം തീരശോഷണത്തിനു കാരണമാകുന്നുണ്ടോ എന്നു പഠിക്കാന് സര്ക്കാര് സമിതിയെ നിയോഗിച്ചു. വിഴിഞ്ഞം തുഖമുഖത്തിനെതിരെ സമരം നടത്തുന്ന സമരസമിതിയുടെ പ്രധാന ആവശ്യം തുറമുഖ നിര്മാണം നിര്ത്തി തീരശോഷണം നടന്നോ എന്നു പരിശോധിക്കണമെന്നായിരുന്നു. വിഴിഞ്ഞത്ത് ലത്തീന് സഭയുടെ നേതൃത്വത്തില് നടക്കുന്ന സമരത്തെത്തുടര്ന്നു തുറമുഖ നിര്മാണം തടസ്സപ്പെട്ടിരിക്കുകയാണ്.
സെന്ട്രല് വാട്ടര് ആന്ഡ് പവര് റിസര്ച്ച് സ്റ്റേഷന്റെ മുന് അഡി. ഡയറക്ടര് എം.ഡി.കുന്ദലെയാണ് സമിതിയുടെ അധ്യക്ഷന്. കേരള യൂണിവേഴ്സിറ്റി ഓഫ് ഫിഷറീസ് ആന്ഡ് ഓഷ്യന് സ്റ്റഡീസ് വൈസ് ചാന്സലര് ഡോ.റജി ജോണ്, ഇന്ത്യന് ഇന്സ്റ്റിറ്റ്യൂട്ട് ഓഫ് സയന്സ് ബെംഗളൂരുവിലെ അസോ.പ്രൊഫസര് ഡോ.തേജല് കനിത്ക്കര്, കണ്ട്ല പോര്ട്ട് ട്രസ്റ്റിന്റെ മുന് ചീഫ് എന്ജിനീയര് ഡോ. പി.കെ.ചന്ദ്രമോഹന് എന്നിവരാണ് അംഗങ്ങള്. സമരസമിതി പ്രതിനിധികളെ ഉള്പ്പെടുത്തിയിട്ടില്ല. തീരശോഷണം നടന്നിട്ടുണ്ടെങ്കില് അതിനുള്ള പ്രതിവിധികള് നിര്ദേശിക്കാനും കമ്മിറ്റിയോട് സര്ക്കാര് ആവശ്യപ്പെട്ടിട്ടുണ്ട്.