ഡല്‍ഹി: ബിജെപിയുടെ അജണ്ടയില്‍ പ്രവര്‍ത്തിച്ചുവെന്ന ബിഹാര്‍ മുഖ്യമന്ത്രി നിതീഷ് കുമാറിന്റെ ആരോപണത്തിന് മണിക്കൂറുകള്‍ക്കുള്ളില്‍ പ്രായം തനിക്ക് കൂടുന്നുവെന്ന പരിഹാസവുമായി തിരിച്ചടിച്ച് തിരഞ്ഞെടുപ്പ് തന്ത്രജ്ഞന്‍ പ്രശാന്ത് കിഷോര്‍. നിതീഷ് കുമാര്‍ അദ്ദേഹത്തിന്റെ പ്രായാധിക്യം കാണിക്കുന്നു. അദ്ദേഹത്തിന് എന്തൊക്കെയോ പറയണമെന്നുണ്ട്. പക്ഷേ, ഉള്ളിലുള്ളതല്ല പുറത്ത് വരുന്നത്. നിതീഷ് പറയുന്നത് മറ്റൊന്നാണ്. ബിജെപിയുടെ അജണ്ടയില്‍ പ്രവര്‍ത്തിക്കുകയാണെങ്കില്‍ എന്തിനാണ് കോണ്‍ഗ്രസിനെ ശക്തിപ്പെടുത്തുന്നതിനെക്കുറിച്ച് സംസാരിക്കുന്നതെന്ന് കിഷോര്‍ ചോദിക്കുന്നു.
ജെഡിയു കോണ്‍ഗ്രസില്‍ ലയിക്കണമെന്ന് താന്‍ പറഞ്ഞതായി ചിലര്‍ ആരോപിക്കുന്നുണ്ടെന്നും പ്രശാന്ത് കിഷോര്‍ പറഞ്ഞു. നിതീഷ് കുമാര്‍ രാഷ്ട്രീയ മോഹിയും നിലവില്‍ ദേശീയ രാഷ്ട്രീയത്തില്‍ നിന്നും ഒറ്റപ്പെട്ടു നില്‍ക്കുകയുമാണ്. ചുറ്റുമുള്ളവരെ വിശ്വസിക്കാന്‍ അദ്ദേഹം തയ്യാറല്ലെന്നും പ്രശാന്ത് കിഷോര്‍ വ്യക്തമാക്കുന്നു. ബിഹാര്‍ മുഖ്യമന്ത്രി നിതീഷ് കുമാര്‍ തിരഞ്ഞെടുപ്പ് തന്ത്രജ്ഞന്‍ ഭാരതീയ ജനതാ പാര്‍ട്ടിയുടെ നിര്‍ദ്ദേശപ്രകാരമാണ് പ്രവര്‍ത്തിക്കുന്നതെന്ന് അവകാശപ്പെട്ടതിന് പിന്നാലെയാണ് കിഷോറിന്റെ പ്രതികരണം.
