ബിഹാര്‍: ബിഹാര്‍ മുന്‍ മുഖ്യമന്ത്രിയും രാഷ്ട്രീയ ജനതാദള്‍ (ആര്‍ജെഡി) സ്ഥാപകനുമായ ലാലു പ്രസാദ് യാദവ് 12-ാം തവണയും പാര്‍ട്ടി അധ്യക്ഷനായി എതിരില്ലാതെ തിരഞ്ഞെടുക്കപ്പെട്ടു. ലാലു മാത്രമാണ് പാര്‍ട്ടി അധ്യക്ഷ സ്ഥാനത്തേക്ക് നാമനിര്‍ദേശ പത്രിക സമര്‍പ്പിച്ചിരുന്നത്. അതിനാല്‍ പാര്‍ട്ടി അധ്യക്ഷനായി എതിരില്ലാതെ തിരഞ്ഞെടുക്കപ്പെടുകയായിരുന്നു.
ന്യൂഡല്‍ഹിയില്‍ നടക്കുന്ന ദ്വിദിന ദേശീയ കണ്‍വന്‍ഷനിലായിരുന്നു ഔദ്യോഗിക പ്രഖ്യാപനം. വൃക്ക മാറ്റിവയ്ക്കല്‍ ശസ്ത്രക്രിയയ്ക്കായി ആര്‍ജെഡി നേതാവ് ലാലു പ്രസാദ് യാദവ് ഒക്ടോബര്‍ 10ന് സിംഗപ്പൂരിലേക്ക് പോകാനിരിക്കെയാണ് പാര്‍ട്ടി അധ്യക്ഷമായുള്ള പ്രഖ്യാപനവും എത്തുന്നത്. സെപ്റ്റംബര്‍ 28ന് ഡല്‍ഹിയിലെ പാര്‍ട്ടി ഓഫീസില്‍ ലാലു നാമനിര്‍ദേശ പത്രിക സമര്‍പ്പിച്ചിരുന്നു.
