തിരുവനന്തപുരം: എസ്.എഫ്.ഐ പിരിച്ചുവിടണമെന്ന് ക.പി.സി.സി പ്രസിഡന്റ് കെ. സുധാകരന്. തിരുവനന്തപുരം ലോ കോളജില് പ്രിന്സിപ്പല് ഉള്പ്പെടെ 21 അധ്യാപകരെ 12 മണിക്കൂര് മുറിയില് പൂട്ടിയിടുകയും ഉപദ്രവിക്കുകയും ചെയ്ത നടപടി പ്രാകൃതമാണെന്നും കെ.പി.സി.സി പ്രസിഡന്റ് പറഞ്ഞു. കയ്യൂക്കിന്റെ ബലത്തില് കലാലയങ്ങളില് കലാപാന്തരീക്ഷം സൃഷ്ടിച്ച് സമരാഭാസം നടത്തുന്ന എസ്.എഫ്.ഐയെ അടിയന്തരമായി പിരിച്ചുവിടുകയാണ് വേണ്ടതെന്നും സുധാകരന് പറഞ്ഞു. സ്വാതന്ത്ര്യം, സോഷ്യലിസം, മതേതരത്വം എന്നിങ്ങനെ എഴുതിവെച്ചിട്ട് അക്രമം, അരാജകത്വം, ഏകാധിപത്യം എന്നിവയാണ് നടപ്പാക്കുന്നത്. അക്രമത്തിലും ഗുണ്ടായിസത്തിലും രക്തച്ചൊരിച്ചിലിലും വിശ്വസിക്കുന്ന മാതൃസംഘടനയെ ആണ് ഇവര് മാതൃകയാക്കുന്നതെന്നും സുധാകരന് പറഞ്ഞു.
കെ.എസ്.യു പ്രവര്ത്തകരെ അക്രമിച്ചതിനും കൊടിമരം നശിപ്പിച്ചതിനും എസ്.എഫ്.ഐ പ്രവര്ത്തകരെ പ്രിന്സിപ്പല് സസ്പെന്ഡ് ചെയ്തതിന്റെ പ്രതികാരമാണ് അധ്യാപകര്ക്കെതിരെ തീര്ത്തതെന്നും സുധാകരന് ആരോപിച്ചു. അതേസമയം ലോ കോളേജില് കെഎസ്യു കൊടി കൂട്ടിയിട്ട് കത്തിച്ച 24 എസ്എഫ്ഐ പ്രവര്ത്തകരുടെ സസ്പെന്ഷന് പിന്വലിക്കില്ല. സംഘര്ഷം അവസാനിപ്പിക്കാന് തിങ്കളാഴ്ച ഇരു വിദ്യാര്ത്ഥി സംഘടനകളുടേയും യോഗം പ്രിന്സിപ്പാള് വിളിച്ചു. സസ്പെന്ഷനിലായ വിദ്യാര്ത്ഥികള്ക്ക് പൊതുപരീക്ഷ എഴുതാം. എസ്എഫ്ഐ അതിക്രമത്തിന് ഇരയായ അസിസ്റ്റന്റ് പ്രൊഫസറുടെ പരാതിയില് പോലീസ് അന്വേഷണം തുടങ്ങി.