കൊച്ചി: റബര് വില 300 രൂപയാക്കിയാല് തെരഞ്ഞെടുപ്പില് ബിജെപിയെ സഹായിക്കുമെന്ന പ്രസ്താവനയില് തലശ്ശേരി ആര്ച്ച് ബിഷപ്പ് ജോസഫ് പാംപ്ലാനിയ്ക്കെതിരെ തെരഞ്ഞെടുപ്പ് കമ്മീഷനില് പരാതി. ബിഷപ്പിന്റെ പ്രസ്താവന പ്രതിഫലം വാങ്ങി വോട്ട് ചെയ്യുമെന്ന സന്ദേശമാണ് നല്കുന്നതെന്ന് പരാതിയില് പറയുന്നു. മലയാള വേദി പ്രസിഡന്റ് ജോര്ജ് വട്ടുകുളമാണ് ബിഷപ്പിനെതിരെ കമ്മീഷനെ സമീപിച്ചത്. ഇത്തരം നിയമലംഘന സന്ദേശങ്ങള് ജനാധിപത്യ വ്യവസ്ഥ തകര്ക്കുമെന്നും ബിഷപ്പിനെതിരെ ശക്തമായ നിയമനടപടി സ്വീകരിക്കണമെന്നും പരാതിയില് പറയുന്നു.
അതേസമയം റബര് വില 300 രൂപയാക്കിയാല് തെരഞ്ഞെടുപ്പില് ബിജെപിയെ സഹായിക്കുമെന്ന നിലപാടില് ഉറച്ചുനില്ക്കുന്നതായി തലശ്ശേരി ആര്ച്ച് ബിഷപ്പ് മാര് ജോസഫ് പാംപ്ലാനി പറഞ്ഞു. ബിജെപി അനുകൂല പ്രസ്താവനയില് നിന്ന് പിന്നോട്ടില്ലെന്ന് മാര് ജോസഫ് പാംപ്ലാനി ആവര്ത്തിച്ചു. ആലോചിപ്പ് ഉറപ്പിച്ചാണ് പറഞ്ഞത്, അണുവിട പിന്നോട്ടില്ല. കര്ഷകരുടെ പ്രശ്നങ്ങളെ കുറിച്ച് പറയുമ്പോള് ഗോഷ്ടി കാണിച്ചിട്ട് കാര്യമില്ലെന്നും മാര് ജോസഫ് പാംപ്ലാനി പറഞ്ഞു. ആരെങ്കിലും എന്തെങ്കിലും വിളിച്ചു പറഞ്ഞാല് നയം മാറ്റുന്നവരാണ് കത്തോലിക്ക മെത്രാന്മാരെന്ന് ധരിക്കേണ്ട. തന്റെ പ്രസ്താവനയില് മതപക്ഷമോ രാഷ്ട്രീയപക്ഷമോ ഇല്ലെന്ന് പറഞ്ഞ ആര്ച്ച് ബിഷപ്പ്, കര്ഷകപക്ഷം മാത്രമേ ഉള്ളൂവെന്നും വ്യക്തമാക്കി.