വയനാട്: ഉടമസ്ഥനറിയാതെ തോട്ടത്തില്‍ വന്‍ മാലിന്യനിക്ഷേപം. വയനാട് കുന്നമ്പറ്റയില്‍ മെയ് ഒന്നിനാണ് സംഭവം. മുട്ടില്‍ കൊളവയലില്‍ മാലിന്യപ്രശ്‌നത്തെ തുടര്‍ന്ന് വിവാദത്തിലായ സ്ഥാപനത്തില്‍ നിന്ന് മാലിന്യം നീക്കം ചെയ്യാന്‍ കരാറെടുത്തവര്‍ ഉടമസ്ഥനറിയാതെ കുന്നമ്പറ്റയിലുള്ള ഒരു തോട്ടത്തില്‍ നിക്ഷേപിക്കുകയായിരുന്നു.
ഹിറ്റാച്ചിയും ടിപ്പറും ഉപയോഗിച്ച് രാത്രിയിലെത്തി തോട്ടം കുഴിച്ചാണ് അറവുമാലിന്യ സംസ്‌കരണ കേന്ദ്രത്തില്‍ നിന്നുള്ള മാലിന്യം വന്‍ തോതില്‍ ഇവിടെ കുഴിച്ചിട്ടത്. തോട്ടത്തില്‍ അസ്വാഭാവിക മാറ്റങ്ങള്‍ കണ്ടതിനെ തുടര്‍ന്ന് മഹാവീര്‍ തോട്ടം ഉടമകള്‍ പിന്നീട് പരിശോധന നടത്തിയപ്പോഴാണ് മാലിന്യ നിക്ഷേപം കണ്ടെത്തിയത്. മാരക ആരോഗ്യപ്രശ്‌നങ്ങളുണ്ടാക്കുന്ന മാലിന്യ നിക്ഷേപത്തിനെതിരെ പിന്നീട് ഉടമകള്‍ മേപ്പാടി പോലീസില്‍ പരാതി നല്‍കി.
