ചവറ : കാറപകടത്തില് ചികിത്സയില് കഴിഞ്ഞ പതിമൂന്നുകാരി മരിച്ചു. നീണ്ടകര പുത്തൻതുറ പരേതനായ അനിമോൻ–ഡോണ ചന്ദ്രൻ ദമ്പതികളുടെ മകൾ അനഘ (13) ആണ് മരിച്ചത്. സംസ്കാരം നടത്തി. നീണ്ടകര സെന്റ് ആഗ്നസ് ഹൈസ്കൂളിലെ എട്ടാം ക്ലാസ് വിദ്യാർഥിയായിരുന്നു അനഘ. അനിമോന്റെ സഹോദരന്റെ മകൾ ആറുവയസ്സുകാരി സ്വാസിക ഗുരുതരാവസ്ഥയില് ആശുപത്രിയില് കഴിയുന്നു.
ഡോണയുടെ കണ്മുന്നില് വെച്ചാണ് അപകടമുണ്ടായത്. ഡോണയും കുട്ടികളും റോഡ് മുറിച്ചു കടക്കാൻ ശ്രമിക്കുന്നതിനിടെ കാറിടിക്കുകയായിരുന്നു. ദേശീയപാതയിൽ നീണ്ടകര താലൂക്ക് ആശുപത്രിക്കു സമീപമായിരുന്നു അപകടം. പരുക്കേറ്റ ഇരുവരെയും കൊല്ലത്ത് സ്വകാര്യ മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചിരിക്കുകയായിരുന്നു. മത്സ്യത്തൊഴിലാളിയായിരുന്ന പിതാവ് അനിമോൻ രണ്ടു മാസം മുൻപ് മുതലപ്പൊഴിയിൽ വെച്ച് വള്ളം മറിഞ്ഞ് മരിച്ചിരുന്നു.
