റാന്നി: ശബരിമല പാതയുമായി ബന്ധപ്പെട്ടുള്ള റോഡുകളുടെ പുനരുദ്ധാരണം അടിയന്തിരമായി നടപ്പാക്കുന്നതിന് കോർ കമ്മിറ്റിയെ നിയോഗിച്ചിട്ടുള്ളതായി പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് പറഞ്ഞു. റാന്നി- കോഴഞ്ചേരി റോഡിൽ പുതിയതായി നിർമ്മിക്കുന്ന പുതമൺ പാലത്തിൻറെ നിർമ്മാണോദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി. ഇത്തവണയും തീർത്ഥാടനം സുഗമാക്കാൻ വേണ്ടതെല്ലാം ചെയ്യും. റോഡുകൾ മികച്ച നിലവാരത്തിൽ നവീകരിച്ചു തുടങ്ങി. അറ്റകുറ്റപ്പണികളും പൂർത്തീകരിച്ചു കൊണ്ടിരിക്കുന്നു. ശബരിമലയുമായി ബന്ധപ്പെട്ട പ്രധാന റോഡാണ് പാലം ഉൾപ്പെടുന്ന റാന്നി- കോഴഞ്ചേരി റോഡ്. ശബരിമല അനുബന്ധ പാതയായി ഉപയോഗിക്കുന്ന റോഡിന്റെ പല ഭാഗങ്ങളും തിരുവാഭരണപാതയായും ഉപയോഗിക്കുന്നുണ്ട്.
2.63 കോടി രൂപയാണ് പുതിയ പാലം നിർമ്മിക്കാനായി ചിലവഴിക്കുക. പാലം നിർമ്മാണം പൂർത്തിയാകുന്നത് വരെ ഇതുവഴി വാഹന ഗതാഗതം സുഗമമാക്കാൻ വേണ്ടി 30 ലക്ഷം രൂപ മുടക്കി താൽക്കാലിക പാതയും നിർമ്മിച്ചിട്ടുണ്ട്. മന്ത്രിസഭയുടെ പ്രത്യേക അനുമതിയോടെയാണ് പുതിയ പാലത്തിന് തുക അനുവദിച്ചത്. നിർമ്മാണവുമായി ബന്ധപ്പെട്ട് പ്രമോദ് നാരായൺ നിരന്തരം ഇടപെട്ടതായി മന്ത്രി യോഗത്തിൽ ഓർമിച്ചു. അഡ്വ. പ്രമോദ് നാരായൺ എംഎൽഎ ശിലാഫല അനാശ്ചാദനം ചെയ്തു. പഞ്ചായത്ത് പ്രസിഡൻറ് കെ ആർ സന്തോഷ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡൻറ് ജെ ഇന്ദിരാദേവി, ജില്ലാ പഞ്ചായത്ത് അംഗം ജോർജ് ഏബ്രഹാം, ബ്ലോക്ക് പഞ്ചായത്ത് അംഗം സാം പി തോമസ്, വൈസ് പ്രസിഡൻ്റ് ഗീതാകുമാരി, പൊതുമരാമത്ത് വകുപ്പ് പാലം വിഭാഗം എക്സി എൻജിനീയർ അജിത്ത്, അസിസ്റ്റന്റ് എൻജിനീയർ ഷിജ തോമസ് എന്നിവർ സംസാരിച്ചു.
