റാന്നി: നാറാണംമൂഴി ഗ്രാമപഞ്ചായത്തിലെ ആറാട്ടുമണ്ണിൽ തോട്ടത്തിനു തീ പിടിച്ചു. പതിനഞ്ചു ഏക്കറോളം കാടുമൂടി കിടന്ന സ്വകാര്യ വ്യക്തിയുടെ തോട്ടത്തിലാണ് ഇന്ന് രാവിലെ 8.30 ടെ തീ പടർന്നത്. തീയും പുകയും ശ്രദ്ധയിൽപെട്ട ഉടൻതന്നെ നാട്ടുകാരുടെ നേതൃത്വത്തിൽ തീ അണക്കാനുള്ള ശ്രമം നടത്തിയതുകൊണ്ട് ജനവാസ മേഖലകളിലും കൂടുതൽ കൃഷിയിടങ്ങളിലേക്കും തീ പടർന്നില്ല. ആറൊന്നിൽ അച്ചൻകുഞ്ഞിന്റെ തോട്ടത്തിലാണ് തീ പടർന്നത്. കാടു തെളിക്കുന്ന ജോലികൾ നടന്നു വരുന്നതോടൊപ്പമാണ് തീ പടർന്നതെന്ന് നാട്ടുകാർ പറയുന്നു.
വിവരം അറിയിച്ചതിനെ തുടർന്ന് റാന്നിയിൽ നിന്നും അഗ്നി രക്ഷാസേന സ്ഥലത്തെത്തിയെങ്കിലും ഇവരുടെ വാഹനം പ്രധാനമായി തീ പടർന്ന് സ്ഥലത്തേക്ക് എത്തിപ്പെടില്ലായിരുന്നു. തുടർന്ന് വാഹനം എത്തിപ്പെടുന്ന പ്രദേശങ്ങളിലേക്ക് തീ പടരാതിരിക്കാനുള്ള നടപടികൾ സ്വീകരിച്ച അഗ്നി രക്ഷാസേന സ്ഥിതിഗതികൾ ശാന്തമായതിനു ശേഷമാണ് മടങ്ങിയത്. വെള്ളവും പച്ച മരച്ചില്ലകളും ഉപയോഗിച്ചാണ് നാട്ടുകാർ തീ അണക്കാൻ ശ്രമിച്ചത്. സമയോചിതമായ ഇടപെടൽ മൂലം ഒഴിവായത് വൻ ദുരന്തമാണ്.
