തൃശ്ശൂർ : തൃശ്ശൂർ അമല നഗറിൽ ഓടിക്കൊണ്ടിരുന്ന കെഎസ്ആർടിസി സൂപ്പർഫാസ്റ്റ് ബസിന് തീപിടിച്ചു. ഇന്ന് ഉച്ചയ്ക്ക് 12:30 ഓടെയാണ് അപകടം നടന്നത്. നെടുമങ്ങാട് നിന്ന് സുൽത്താൻ ബത്തേരിക്ക് പോവുകയായിരുന്ന ബസാണ് അപകടത്തിൽപെട്ടത്. അമല ആശുപത്രിക്ക് സമീപം വെച്ച് ബസിന്റെ മുൻഭാഗത്തുനിന്നും തീയും പുകയും ഉയരുന്നത് ശ്രദ്ധയിൽപെട്ട നാട്ടുകാരും പുറകെ വന്ന വാഹനയാത്രക്കാരും ഉടൻ തന്നെ വിവരം ഡ്രൈവറെ അറിയിക്കുകയായിരുന്നു. ബസ് ഉടൻ തന്നെ നിർത്തുകയും നാട്ടുകാരുടെ ഇടപെടലിലൂടെ യാത്രക്കാരെ എല്ലാവരെയും സുരക്ഷിതമായി പുറത്തിറക്കുകയും ചെയ്തു.
ഫയർഫോഴ്സ് സ്ഥലത്തെത്തുന്നതിന് മുൻപ് തന്നെ നാട്ടുകാർ ഫയർ എക്സ്റ്റിംഗുഷറുകൾ ഉപയോഗിച്ച് തീ അണയ്ക്കാൻ ശ്രമിച്ചു. അപകടത്തിൽ ആർക്കും പരിക്കുകളില്ല. ഷോർട്ട് സർക്യൂട്ടാണ് തീപിടുത്തത്തിന് കാരണമെന്നാണ് പ്രാഥമിക നിഗമനം. നിലവിൽ അപകടത്തിൽപ്പെട്ട ബസ് തൃശ്ശൂർ കെഎസ്ആർടിസി ഡിപ്പോയിലെ ഉദ്യോഗസ്ഥർ പരിശോധിച്ചുവരികയാണ്.
