റാന്നി: മീന് പിടിക്കാന് പമ്പാനദിയില് ഇറങ്ങിയ മധ്യവയസ്ക്കന് മീന്വലയില് കുടുങ്ങി മുങ്ങി മരിച്ചു. അത്തിക്കയം കടുമീൻചിറ ഓലിക്കൽ വീട്ടിൽ ഭാസുരന്റെ മകന് ബി. ബിജു (54) മുങ്ങി മരിച്ചത്. സുഹൃത്തുക്കളോടൊപ്പം ബുധനാഴ്ച വൈകിട്ട് മീന് പിടിക്കാന് അത്തിക്കയം പാലത്തിന് മുകളിലായി പമ്പാനദിയില് ഇറങ്ങിയപ്പോഴാണ് അപകടം. വല ഇടാനായി നദിയില് നീന്തിയ വഴിയാണ് വല കാലില് കുരുങ്ങിയത്. ഏറെ സമയം കഴിഞ്ഞും കാണാതെ വന്നതോടെ കൂടെ ഉണ്ടായിരുന്നവര് പോലീസില് വിവരം അറിയിക്കുകയായിരുന്നു.
പെരുനാട് പോലീസും അഗ്നിശമന സേനയുടെ റാന്നി യൂണിറ്റും എത്തി നടത്തിയ പരിശോധനയില് വെളിച്ച കുറവു മൂലം കണ്ടെത്താന് കഴിഞ്ഞില്ല. തുടര്ന്ന് വ്യാഴാഴ്ച രാവിലെ സ്ഥലത്തെത്തിയ സ്കൂബ ഡൈവിംങ് ടീം മൃതദേഹം കണ്ടെടുക്കുകയായിരുന്നു. പോസ്റ്റ് മോര്ട്ടം നടപടികള് പൂര്ത്തീകരിച്ചു മൃതദേഹം ബന്ധുക്കള്ക്ക് കൈമാറി. സംസ്കാരം നാളെ പകല് 11.30 ന് വീട്ടുവളപ്പിൽ നടക്കും. മാതാവ്: ഓമന. മകൾ: ഷിജി, മരുമകൻ: സജിൻ.
