കോന്നി : പുനലൂർ – മൂവാറ്റുപുഴ സംസ്ഥാന പാതയിൽ കോന്നി കൂടൽ പോലീസ് സ്റ്റേഷന് സമീപം പുലർച്ചെയുണ്ടായ വാഹനാപകടത്തിൽ പത്ര ഏജന്റ് അത്ഭുതകരമായി രക്ഷപ്പെട്ടു. റോഡരികിൽ പാർക്ക് ചെയ്തിരുന്ന ഇലക്ട്രിക് ഓട്ടോറിക്ഷയിലേക്ക് നിയന്ത്രണം വിട്ട മിനി ബസ് ഇടിച്ചുകയറുകയായിരുന്നു. കൂടൽ സ്വദേശി ഉഷസ് ഭവനിൽ ഗീവർഗീസാണ് അപകടത്തില് നിന്നും തലനാരിഴയ്ക്ക് രക്ഷപെട്ടത്. അപകടത്തിൽ ആർക്കും പരിക്കേറ്റിട്ടില്ല. ഇന്ന് പുലർച്ചെ അഞ്ച് മണിയോടെയായിരുന്നു സംഭവം. പതിവുപോലെ പുലർച്ചെ ഓട്ടോറിക്ഷയിൽ പത്ര വിതരണത്തിനായി എത്തിയതായിരുന്നു ഗീവർഗീസ്.
പോലീസ് സ്റ്റേഷന് സമീപം വാഹനം പാർക്ക് ചെയ്ത ശേഷം, അടുത്തുള്ള വീടുകളിൽ പത്രം നൽകാനായി പോയി. തുടർന്ന് പത്രം വിതരണം ചെയ്ത് തിരികെ വാഹനത്തിനടുത്തേക്ക് നടന്നു വരുന്നതിനിടയിലാണ് അപകടം നടന്നത്. തമിഴ്നാട്ടിലെ തെങ്കാശി സ്വദേശികള് സഞ്ചരിച്ചിരുന്ന മിനി ബസാണ് ഓട്ടോയില് ഇടിച്ചത്. ഇടിയുടെ ആഘാതത്തിൽ ഓട്ടോറിക്ഷയ്ക്ക് കാര്യമായ കേടുപാടുകൾ സംഭവിച്ചു. പത്രം വിതരണം ചെയ്യാൻ ഗീവർഗീസ് ഓട്ടോ റിക്ഷയില് നിന്നും ഇറങ്ങിയതിനാല് വലിയ ദുരന്തം ഒഴിവാകുകയായിരുന്നു.
