റാന്നി: തോട്ടമൺകാവ് ദേവീക്ഷേത്ര സന്നിധിയിൽ അംബായാഗം 2026-ന്റെ ഭാഗമായി നടന്നുവരുന്ന 21 ദിവസത്തെ നാരായണീയ പാരായണയജ്ഞം പതിമൂന്നാം ദിനത്തിലും ഭക്തിസാന്ദ്രമായി തുടർന്നു. അങ്ങാടി ഗ്രാമപഞ്ചായത്ത് പ്രസിഡന്റ് ബി. സുരേഷ് പതിമൂന്നാം ദിവസത്തെ ചടങ്ങുകൾ ഉദ്ഘാടനം ചെയ്തു.
ദേവസ്വം പ്രസിഡന്റ് അഡ്വ. ഷൈൻ ജി. കുറുപ്പ് അധ്യക്ഷത വഹിച്ചു. ആചാര്യ വിജയലക്ഷ്മി, പി. എസ്. ആനന്ദമ്മ, ദേവസ്വം സെക്രട്ടറി പി. ശ്രീകുമാർ, സി. എൻ. പ്രസാദ് തുടങ്ങിയവർ സംസാരിച്ചു. ശ്രീ വെട്ടൂരപ്പൻ നാരായണ പാരായണ സമിതി, സാന്ത്രാനന്ദം നാരായണീയ സമിതി ഇളകൊള്ളൂർ എന്നീ സമിതികളാണ് പതിമൂന്നാം ദിവസത്തെ നാരായണീയ പാരായണം സമർപ്പിച്ചത്.
വ്യത്യസ്ത പ്രദേശങ്ങളിൽ നിന്നുള്ള സമിതികൾ ഓരോ ദിവസവും തോട്ടമൺകാവ് സന്നിധിയിൽ ഒത്തുചേരുന്നതിലൂടെ നാരായണീയ പാരായണയജ്ഞം ഒരു തുടർച്ചയായ ആത്മീയ സംഗമമായി മാറുകയാണ്. പാരായണം സമർപ്പിക്കുന്ന ഓരോ സമിതിയും അംബായാഗത്തിന്റെ മുന്നൊരുക്കങ്ങളിൽ തങ്ങളുടെ സാന്നിധ്യം രേഖപ്പെടുത്തുകയാണ്.
ഒക്ടോബർ 9 മുതൽ 18 വരെ നടക്കുന്ന അംബായാഗത്തിന് മുന്നോടിയായി നടക്കുന്ന ഈ 21 ദിവസത്തെ പാരായണയജ്ഞം ഭക്തജനങ്ങളെ ഒരുമിപ്പിക്കുന്ന ആത്മീയ യാത്രയായാണ് മുന്നേറുന്നത്.
നാളെ പതിനാലാം ദിനം
നാരായണീയ പാരായണയജ്ഞത്തിന്റെ പതിനാലാം ദിവസമായ നാളെ ശ്രീ അയ്യപ്പ നാരായണീയ സമിതി, ഇടക്കുളം പാരായണം സമർപ്പിക്കും.
