തിരുവനന്തപുരം : സംസ്ഥാന ശിശുക്ഷേമ സമിതിയുടെ കീഴിൽ പ്രവർത്തിക്കുന്ന തിരുവനന്തപുരത്തെ അമ്മത്തൊട്ടിലിൽ പുതിയ അതിഥിയെത്തി. ആൺകുഞ്ഞിന് ‘സമൻ’ എന്ന് പേര് നൽകി. തിരുവനന്തപുരം അമ്മത്തൊട്ടിലിൽ ഈ വർഷം ലഭിക്കുന്ന പതിമൂന്നാമത്തെ കുഞ്ഞാണ് സമൻ. സെപ്റ്റംബർ മാസം അമ്മത്തൊട്ടിലിലേക്ക് എത്തിയത് 3 കുഞ്ഞുങ്ങളാണ്. ഓണക്കാലത്ത് ലഭിച്ച കുഞ്ഞിന് തുമ്പ എന്നും രണ്ടാമത്തെ കുട്ടിക്ക് മുകിൽ എന്നും പേര് നൽകിയിരുന്നു. സ്നേഹ കൂടിലേക്ക് ചേക്കേറിയ കുരുന്നിന് 2.4കി.ഗ്രാം തൂക്കം ഉണ്ട്.
നാട്ടിൽ സമത്വവും തുല്യതയും നല്ല മനസ്സും കാത്ത് സൂക്ഷിക്കാനായി സമൂഹത്തിനായുള്ള സന്ദേശമായി പുതിയ കുരുന്നിന് ” സമൻ” എന്നു പേരിട്ടതായി സംസ്ഥാന ശിശുക്ഷേമ സമിതി ജനറൽ സെക്രട്ടറി ജി.എൽ. അരുൺ ഗോപി പത്രകുറിപ്പിൽ അറിയിച്ചു. കുഞ്ഞിനെ ലഭിച്ച ഉടൻ തൈക്കാട് കുട്ടികളുടെ ആശുപത്രിയിൽ എത്തിച്ച് പ്രാഥമിക പരിശോധനയിൽ മറ്റ് ആരോഗ്യ പ്രശ്നങ്ങൾ ഒന്നുമില്ലാത്തതിനാൽ തിരികെ സമിതി ദത്തെടുക്കൽ കേന്ദ്രത്തിൽ എത്തിച്ച് “അമ്മ” മാരുടെ പൂർണ്ണ നിരീക്ഷണത്തിലും പരിചരണയിലുമാണ് സമൻ. നിലവിലുള്ള ഭരണ സമിതി അധികാരത്തിൽ വന്ന ശേഷം 175കുട്ടികളെയാണ് ഇതുവരെ ഉചിതമായ മതാപിതാക്കളെ നിയമപരമായ കണ്ടെത്തി ദത്ത് നൽകിയത്.
