തിരുവനന്തപുരം: തിരുവനന്തപുരം കിളിമാനൂരിൽ നിർത്തിയിട്ടിരുന്ന കാർ ചരക്ക് വാഹനം ഇടിച്ചുതെറിപ്പിച്ച സംഭവത്തിൽ യാത്രക്കാർ അത്ഭുതകരമായി രക്ഷപ്പെട്ടു. എംസി റോഡിലെ ഇരട്ടച്ചിറ ഭാഗത്ത് ഇന്നലെ ഉച്ചയോടെയായിരുന്നു അപകടം. റോഡരികിൽ നിർത്തിയിട്ടിരുന്ന കാറിലേക്ക് നിയന്ത്രണം വിട്ടെത്തിയ ചരക്ക് വാഹനം ഇടിച്ചുകയറുകയായിരുന്നു. ഇടിയുടെ ആഘാതത്തിൽ കാർ മുന്നോട്ട് തെറിച്ചുപോകുകയും വാഹനത്തിന് കേടുപാടുകൾ സംഭവിക്കുകയും ചെയ്തു. അപകടത്തിന്റെ ദൃശ്യങ്ങൾ സമീപത്തെ സിസിടിവി ക്യാമറകളിൽ പതിഞ്ഞതായും വിവരം ലഭിച്ചിട്ടുണ്ട്.
അപകടം നടന്ന സമയത്ത് കാറിന്റെ പാസഞ്ചർ സീറ്റിൽ ഒരു സ്ത്രീയും കുഞ്ഞും ഉണ്ടായിരുന്നു. എന്നാൽ ഇവർ വാഹനത്തിൽ നിന്ന് പുറത്തിറങ്ങി ഏതാനും സെക്കൻഡുകൾക്കകം ചരക്ക് വാഹനം കാർ ഇടിച്ചുതെറിപ്പിക്കുകയായിരുന്നു. അതിനാൽ വലിയ ദുരന്തമാണ് ഒഴിവായത്. കാറിലുണ്ടായിരുന്ന ഡ്രൈവർ ഉൾപ്പെടെയുള്ളവർക്ക് കാര്യമായ പരിക്കുകളൊന്നും സംഭവിച്ചില്ല. നിമിഷങ്ങളുടെ വ്യത്യാസത്തിൽ ജീവൻ രക്ഷപ്പെട്ട സംഭവത്തിന്റെ ഞെട്ടലിലാണ് കുടുംബവും പ്രദേശവാസികളും. അപകടത്തെ തുടർന്ന് പ്രദേശത്ത് കുറച്ചുസമയം ഗതാഗത തടസ്സവും അനുഭവപ്പെട്ടു.
