വെണ്ണിക്കുളം : വെണ്ണിക്കുളം സെന്റ് ബഹനാൻസ് ഹൈസ്കൂളിലെ 1984 പത്താംക്ലാസ് ബാച്ച്കാരുടെ സംഗമം പഴയകാല സ്കൂൾ ജീവിതത്തിലെ ഓർമ്മകളുടെ പുതിയ സ്മരണകളുയർത്തി. വെണ്ണിക്കുളം സെന്റ് ബഹനാൻസ് ഹൈസ്കൂളിലെ ഓഡിറ്റോറിയത്തിൽ നടന്ന പൂർവ വിദ്യാർഥി സംഗമത്തിൽ 1984 ബാച്ചിൽ പഠിച്ച നൂറിലധികം വിദ്യാർത്ഥികളും കുടുംബാംഗങ്ങളും പങ്കെടുത്തു. ബാച്ച് പ്രസിഡന്റ് അഹമ്മദ് സാലിയുടെ അധ്യക്ഷതയിൽ കൂടിയ സമ്മേളനം രാജ്യസഭ ഉപാധ്യക്ഷൻ പ്രൊഫ. പി. ജെ.കുര്യൻ ഉദ്ഘാടനം ചെയ്തു. സംസ്ഥാന പ്ലാനിങ് ബോർഡ് അംഗം ഡോ. വർഗീസ് ജോർജ് മുഖ്യപ്രഭാഷണം നടത്തി.
പുറമറ്റം ഗ്രാമപഞ്ചായത്ത് അംഗം മിനി തോമസ്, സ്കൂൾ പ്രിൻസിപ്പാൾ ഡോ.ജേക്കബ് എബ്രഹാം, പ്രധാന അധ്യാപിക രജനി ജോയ്, വൈസ് പ്രസിഡന്റ് ബിജു ജേക്കബ് കൈതാരം, തോമസ് എബ്രഹാം, സി.ജെ. രാജൻ, വിജു സ്കറിയ, ജോൺ മാത്യു, എന്നിവർ പ്രസംഗിച്ചു. സ്കൂൾ പ്രിൻസിപ്പാൾ ഡോ.ജേക്കബ് എബ്രഹാമിന് റിട്ടയർമെന്റ് ഉപഹാരം പ്രൊഫ.പി. ജെ. കുര്യൻ നൽകി. ഉന്നത വിജയം കരസ്ഥമാക്കിയ വിദ്യാർത്ഥികളെയും ആദരിച്ചു. തുടർന്ന് സ്നേഹ വിരുന്നോടുകൂടി 41 വർഷത്തെ സ്കൂൾ സ്മരണകൾ പങ്കുവെച്ച് പിരിഞ്ഞു.
