കോട്ടയം: കോട്ടയത്ത് വെള്ളപ്പൊക്കത്തിന് ശേഷം ആക്രിക്കടകളിലേയ്ക്ക് എത്തുന്നവര്‍ തിരികെ പോകുന്നത് കൈ നിറയെ കാശും കൊണ്ട്. ഒഴുക്കുവെള്ളത്തില്‍ പിടിച്ചെടുത്തവ കൂട്ടത്തോടെ ആക്രിക്കടകളില്‍ നിറയുകയാണ്. കുപ്പി, കമ്പി , ടയര്‍ ഉള്‍പ്പെടെയുള്ള പാഴ് വസ്തുക്കള്‍ ഇപ്പോള്‍ കൂടുതലായി എത്തുന്നുണ്ട്. കേരള സ്‌ക്രാപ്പ് മര്‍ച്ചന്റ് അസോസിയേഷന്‍റെ ആക്രി ആപ്പില്‍ പഴയ പത്രത്തിന് കിലോ 24 രൂപയാണ് വില. എന്നാല്‍ മൊത്ത വ്യാപാര കടകളില്‍ 30 രൂപ ലഭിക്കും. ഒരു കിലോ പ്ലാസ്റ്റിക്ക് കുപ്പിയ്ക്ക് 14 രൂപ കിട്ടും. കാര്‍ട്ടണ്‍, വീപ്പ, ഇരുമ്പ് കമ്പികള്‍ എന്നിവയ്ക്കും നല്ല വിലയുണ്ട്. വില ഇനിയും ഉയരുമെന്നാണ് കച്ചവടക്കാര്‍ പറയുന്നത്. സി.പി.യു, മോണിറ്റര്‍, എല്‍.ഇ.ഡി ടി.വി, മൊബൈല്‍ ഫോണുകള്‍ എന്നിവയും ഇപ്പോള്‍ ആക്രി കടകളിലെടുക്കും. സര്‍ക്കാരിന്‍റെ കുടിവെള്ള പദ്ധതികളുടെ പൈപ്പുകളും കേബിളുകളും അലൂമിനിയം കമ്പികളും ഫുഡ് കണ്ടെയ്നറുകളും ഗ്യാസുകുറ്റികളും വീപ്പകളും വരെ എത്തുന്നു.
