പുല്ലാട്: വിവാഹവാഗ്ദാനം നല്കി പതിനാറുകാരിയെ ലൈംഗികമായി പീഡിപ്പിച്ച യുവാവ് അറസ്റ്റിൽ. കോയിപ്രം പോലീസ് ആണ് അറസ്റ്റു ചെയ്തത്. ഇതേ പെണ്കുട്ടിയോട് ലൈംഗികാതിക്രമം കാട്ടിയ ഇയാളുടെ രണ്ട് സുഹൃത്തുക്കളും പിന്നീട് പിടിയിലായി. മൂന്നു കേസുകളിലായാണ് അറസ്റ്റ്. പെണ്കുട്ടിയെ വീട്ടില്നിന്നു വിളിച്ചിറക്കി മോട്ടോര് സൈക്കിളില് കയറ്റി തട്ടിക്കൊണ്ടുപോയി വിവിധ സ്ഥലങ്ങളിലെത്തിച്ചു ലൈംഗികമായി പീഡിപ്പിച്ചതിന്, തിരുവനന്തപുരം സ്വദേശിയും തൊട്ടപ്പുഴശേരി ചിറയിറമ്പ് പനച്ചേരിമുക്ക് വള്ളിക്കാട്ടു വീട്ടില് താമസിക്കുന്നയാളുമായ ജിഫിന് ജോര്ജിനെ(27)യാണ് അറസ്റ്റു ചെയ്തത്.
വിവാഹം കഴിക്കാമെന്ന് വാക്കുനല്കിയാണ് കുട്ടിയെ ഇയാള് തട്ടിക്കൊണ്ടുപോയത്. കുട്ടിയുടെ മാതാവിന്റെ മൊഴിപ്രകാരമാണ് കേസ് രജിസ്റ്റര് ചെയ്തത്. കുട്ടിയുടെ വിശദമായ മൊഴി രേഖപ്പെടുത്തിയപ്പോഴാണ് പീഡനം സംബന്ധിച്ച കൂടുതല് വിവരങ്ങള് പുറത്തുവന്നത്. തുടര്ന്ന്, കുട്ടിയെ ലൈംഗികമായി ഉപദ്രവിച്ച രണ്ടുപേര് കൂടി പിടിയിലായി. തോട്ടപ്പുഴശേരി ചിറയിറമ്പ് പനച്ചേരിമുക്ക് കുഴിമണ്ണില് മെല്വിന് ടി. മൈക്കിള് (24), മാരാമണ് കണ്ടത്തില് ജിമ്മി തോമസ് (24) എന്നിവരാണ് തുടര്ന്നെടുത്ത രണ്ട് കേസുകളിലായി അറസ്റ്റിലായത്. ഇരുവരും ജിഫിന്റെ സുഹൃത്തുക്കളാണ്. പെണ്കുട്ടിക്കുനേരെ ലൈംഗികാതിക്രമം നടത്തിയതിനാണ് ഇവര്ക്കെതിരേ കേസെടുത്തത്. പ്രതികളെ കോടതിയിൽ ഹാജരാക്കി.
