റാന്നി : പഠനം രസകരമാക്കാൻ ഓണം വൈബിൽ പാട്ടുകളുമായി പുല്ലൂപ്രം പി.സി ഹൈസ്കൂളിൽ ബി.പി.സി ഷാജി എ. സലാമെത്തി. കുട്ടികളുടെ സമഗ്രമായ വികാസം ലക്ഷ്യമിട്ടാണ് വിദ്യാലയങ്ങളിലെ പഠന പ്രവർത്തനങ്ങളും അതിന്റെ വിലയിരുത്തൽ പ്രക്രിയയും വിഭാവനം ചെയ്തിട്ടുള്ളത്. നിശ്ചിത പഠന വിഷയങ്ങൾ ആർജിക്കാതെ തുടർപഠനം നടത്തുന്നത് പാഠ്യപദ്ധതി വിഭാവനം ചെയ്യുന്ന പഠന ലക്ഷ്യങ്ങൾ ആർജിക്കുന്നതിന് വിലങ്ങുതടിയാവും. ഈ സാഹചര്യത്തിൽ കുട്ടികൾക്ക് പഠന പിന്തുണ നൽകിയുള്ള പ്രത്യേക പരിപാടിക്ക് തുടക്കമായി.
റാന്നി ബിആർസിതല ഉദ്ഘാടനം പുല്ലൂപ്രം പി.സി ഹൈസ്കൂളിൽ ബി.പി.സി ഷാജി എ. സലാം ഉദ്ഘാടനം ചെയ്തു. സ്കൂൾ മാനേജർ പി. രാജ്കുമാർ അധ്യക്ഷത വഹിച്ചു. പി.ടി.എ പ്രസിഡന്റ് ലിസ്സി രാജു, ക്ലസ്റ്റർ കോ-ഓർഡിനേറ്റർ ബി.ശില്പ നായർ, സ്റ്റാഫ് സെക്രട്ടറി പി.കെ ജയശ്രീ എന്നിവർ സംസാരിച്ചു. സെപ്റ്റംബർ 26 വരെ കുട്ടികൾക്ക് പഠന പിന്തുണ നൽകിക്കൊണ്ടുള്ള പ്രത്യേക പരിപാടികൾ വിദ്യാലയങ്ങളിൽ നടക്കും. മുപ്പതിന് എസ്. ആർ. ജി യോഗം കൂടി ഫലപ്രാപ്തി വിലയിരുത്തും.
